Zofate rorêlna pakhat hnuaia awm hun Dawhthei takin i nghak ang u - CM Hawla

NLUP Implementing Board (NIB) bultumin Art & Culture department leh Mizo Cultural Organistion (MCO) ṭangkawp chuan nimin khan R Dengṭhuama Hall-ah Mizo Hnahthlak International Cultural Festival an buatsaih. Khuallian, chief minister Lal Thanhawla chuan, rorelna pakhat hnuaia Zo hnahthlakte an awm hun tur dawhthei taka thlir turin Zo fate a sáwm.

Chief Minister chuan, 'In­suih­khawm leh zai i rel ang u' tihin Mizote lung a tiléng chu lawmawm a tih thu sawiin, "Mahse, Pathian hun ruatah lo chuan a thleng dawn lo. Dawh­thei takin Pathian hun ruat i ngaichâng ang u. Tharum thawhte leh thisen chhuahte hi chunglam khian a ngaisang lo," a ti.

Zo hnahthlak tawh phawt chu khawi hmunah pawh awm se, Duhlian ṭawngin an inbe thei deuh vek tih sawiin Lal Thanhawla chuan, "Duhlian ṭawng hmang thei lo pawhin an hrethiam ṭhin. Hei hi Zo hnahthlakte special taka siam kan ni tih lantirna a ni," a ti a; Zo hnahthlak zawng zawngte Pathian ringtu an ni chu thil lawmawm tak a nih thu a sawi.

Chief Minister chuan, Zo hnah­thlakte chu thisen inzawm, chhûl khat kual an ni tih hriat a pawimawh thu sawiin, "In­pumkhatana atan hman tum a pawimawh. Tun hma aia ṭhaa inlaichìnna ṭha, inkungkaihna ṭha zawk kan neih theiha atan Fes­tival hi hman a pawimawh," a ti.

Khualropui R Lalzirliana, Home minister chuan, chi bil politics chu inpumkhatna dâltu a ni fo tih sawiin, "Chi bil politics-ah hian fihlim i tum ang u. Inngeih lo tham kan awm lo a, ṭangrual tham erawh kan ni," a ti a; Mizo nihna chu páwn lam thilin a tihbuai theih loh tura humhim a pawimawh thu a sawi.

R Lalzirliana chuan, ṭang­tharte'n Zo hnahthlakte unau an nihna an hrethiam lo telh telh tih sawiin, "Chîmral tham lek kan nih avangin inthurual a ngai. Mizoramah Zo fate kan awm vek thei lo a, kan Mizo hian ramri a kân a ngai. Hnam ropui leh hmasawn reng rengin hnama chian a pawimawhna an hre zel," a ti.

Hnam incheina inbel vang ringawta hnam chiang emaw inti an awm ṭhin thu sawiin Home Minister chuan, "Chhungril lama kan chian si loh chuan a daih rei lo," a ti a; hmasawn zel chungin Mizo hnam dinchhuahna atana thawktute theihnghilh loh a pawimawh thu a sawi bawk.

Mizo Hnahthlak International Cultural Festival-ah hian kut thlengtu Art & Culture minister R Romawia, khualzahawm NIB chairman JH Roṭhuama leh MCO president James Lalchhuanawma te pawhin thu an sawi.
Festival-ah hian Mizoram hmun hrang hrang leh Myanmar aṭangin Zo hnahthlak hnuaia hnam chi hrang hranga an tel a, hnam làm chi hrang hrang an entir a ni.