MLPC Act zirchianna pharh

State Prohibition Council (SPC) chu nimin khan Excise & Narcotics minister R Lalzirliana hoin Aijal Club-ah an ṭhu­khawm a; sorkar dan anga zu zawrhin khawtlang a nghawng dan zir chiangtu Study Group of MLPC Act, 2014 report pharh a ni.

R Lalzirliana chuan, Mizoramin Mizoram Liquor (Prohibition and Control) Act, 2014 (MLPC Act) a hman hnua khaw­tlang nun bakah, sum leh pai dinhmun a nghawng dan chipchiar taka zir turin Study Group of MLPC Act 2014 chu March 10, 2017-ah din a nih thu a sawi a, "Zirchianna hi scientific based research a ni a. Mizoram chhung bik zirchianna atan hian khawvel ram danga an tih dante thlengin hmaih loa zir leh ràwn tel a ni a, a rintlakin, Mizoram tan report hi a la hlu telh telh dawn a ni," a ti.

Excise & Narcotic Minister sawi danin, zirchianna atana data lak khawmte chu NIMHAN, Bangalore-a Psychiatry professor Dr Vivek Jyoti Kumar leh Mizoram University-a SEMIS dean Prof. NVI Jyoti Kumar te zirchiantir an ni a; anni hian zirchianna chu rin­tlakah an ngai a ni.

Study Group of MLPC Act 2014-ah hian Dominic Lalhmangaiha chu convener a ni a, bakah member dangte chu - Lt.Col. (Rtd) Lal­ramhluna, Dr Laldin­liana Varte (MZU), Dr K Lalbiakzuala (surgeon), Dr C Lalhrekima (psychiatrist), Lalbiakvela (kohhran upa) leh Vanlalrema Vantawl (MJA aiawh)-te an ni. Study Group report-ah hian zirchianna chu sector 10 hnuaiah Costs leh Benefits anga chhût leh hrilh­fiah a ni.

MLPC Study Group chuan, an report-ah hian an data lak khawm aṭanga an hmuh dan behchhanin zu chungchanga hmalak zel theih dan tur kawng pathum - prohibition (zu khap), partial/controlled prohibition (khuahkhirh chunga zu zawrh) leh free sale (khuahkhirhna tel loa zalen taka zu zawrh)-te an telh a ni.

Study Group hian sector 10 hnuaiah MLPC Act hi an zir chiang a; chu'ngte chu - cost (a man), benefit (a hlâwkna), consumer, retail, tax, health care (hriselna lam), education (zirna lam), police & justice (dan leh thupek lam), public authority, church and community (kohhran leh khawtlang a nghawng dan), others in society (members of family/victim) leh other externalities-te a ni.