MZU-ah Centre for Disability Studies hawn a ni

Rualbanlote harsatna hrang hrang zirchianna hmun, Centre for Disability Studies chu nimin khan Mizoram University (MZU)-ah Union minister of state for Social Justice & Empowerment Krishanpal Gurjar leh chief minister Lal Thanhawla ten an hawng. He centre hi India rama a hmasa ber a ni.

Union minister Krishanpal Gurjar chuan, sorkar laipui aiawhin MZU hnuaia Disability Studies Centre thar hawn tak chu duhsakna a hlân a, "Pianphunga rualbanlote'n harsatna an tawh hrang hrangte zir chian zel a nih theih nan leh an harsatnate sutkian dan ruahmansak a pawimawh. An khawsak a awlsam lehzual theihna atan chak zawka hmalak zel a ni ang," a ti.

Krishanpal Gurjar chuan, rualbanlote'n mahni inrintâwkna an neih a pawimawh thu sawiin, "An eizawnna kawng engah pawh chhawr tlaka thiamna an neih a pawimawh a ni," a ti a; mi pangngaite ang bawka rualbanlote'n hringnun nuam leh hlim tak an hman theihna tura hmalak chu anmahni leh anmahni buaipuitute chauh ni loin, mi tin mawhphurhna a nih thu a sawi.

Chief minister Lal Thanhawla pawhin thu sawiin, centre hawn thar tâk chuan ram pumah Mizoram chu hmingṭhatna leh mithiamte hriat a hlawhtir ngei a beisei thu a sawi a, "Mizoram ang tlang ramah chuan rualbanlote tan an ni tin chêt velna leh khawsakah harsatna a tam lehzual a, hei hi sorkar pawhin hriatpuiin, theihtawp a chhuahsak mek a ni," a ti.

Sorkar laipuiin rualbanlote tan Common Identification Card siamsak a tum thu sawiin Chief Minisier chuan, "Hei hian an zirnaah te, hriselna enkawl­na kawngahte leh ram inrêlbawl­naa an inhmanna tur (political participation)-ah pawh a ṭangkai ngei ang," a ti a; centre hawn tâka research ti tura kal tur zawng zawngte duhsakna a hlan a ni.

Centre hawn inkhawmah hian Ministry of Social Justice & Em­powerment-a joint secretary Dolly Chakravarty leh MZU vice chancellor Prof. Simbasiva Rao te pawhin thu an sawi.

Centre for Disability Studies hi Ministry of Social Justice & Em­po­werement hnuaia Department of Persons with Disabilities-in a sakna tur sum an tum a, kum 2015-ah sak ṭan niin, June, 2018-ah sak zawh a ni.