Adhoc aided H/S-te'n provincialise beisei

Mizoram Government Ad hoc Aided High School Teachers’ Association (MIGAHTA) chuan nimin khan Ramhlun Indoor Stadium-ah Special Meeting an nei a; resolution pass in, adhoc aided high school-te chu Mizoram sorkarin a lak (provincialise) ngei an beisei thu an tarlang.

MIGAHTA resolution chuan, "Ram tana kan thawhte chief minister Lal Thanhawla leh a kaihhruai sorkarin min hriatsak a, khawtlang leh zirlaite leh a thawktute hamṭhatna hrang hrang awm theite leh, kan dinhmun khawngaihthlakziate min hriatpui a, provincialised status-a min dah ngei turin kan ngenin kan beisei tlat a ni," an ti.

MIGAHTA chuan, Mizoram sorkar hnathawk dangte ang bawka khaihlak awm loa hlawh ṭha taka sorkarin a pek ṭhin vang te, sorkar hnathawk dangte ruala 7th. Pay an lak theihna tura Cabinet-in thutlukna a siam vang te, headmaster leh teaching staff tana selection grade leh senior grade bakah, non-teaching staff tana MACP facility sorkarin a pek avangtein an lawm thu an sawi a; provincialised an nihna tura hma an laknaah Chief Minister leh School Education minister H Rohluna te duhsaknaah an lawm thu an sawi bawk.

Tuna adhoc aided H/S-a thawktu tam zawk chu kum 40/50 chuang tawh an nih thu sawiin MIGAHTA chuan, "Service security neih hlan kan nghakhlel tak zet. 7th. Pay anga kan hlawh hi kalpui a nih hnu phei chuan adhoc aided-a thawkte hlawh leh provincialised-a thawkte hlawh hi a danglamna a tlem tak em avangin, provincialised status-a min hlankai hi sorkar tan rip lutuk lo turah kan ngai," an ti.

MIGAHTA Special Meeting-ah hian an member school-a headmaster-te leh district tina an pawl office bearer-te an tel a; Chief Minister Relief Fund-ah Rs. 10,000 pek an rel a ni.