KHAWTHLIR

MHIP Day
Vawiin July 6 hi Mizo Hmeichhe Insuihkhawm Pawl (MHIP) din champha, MHIP Day vawi 44-na a ni a, Mizoram chhung leh páwna MHIP branch leh block hrang hrangte'n an lawm dawn. MHIP General Headquarters chuan thuchhuah siamin, MHIP Day-ah hian MHIP member zawng zawng chibai an bûk tih an tarlang a, "Hlim taka hmang turin duhsakna kan hlan a, kan motto ‘Mite ṭanpui’ a nih anga mi dangte tana malsawmna ni turin branch tin kan ngen a ni," an ti.

Speaker-in enfiah
Nimin khan Assembly speaker Hiphei chuan a bial chhung, Chakhei khuaa NEDP hnuaia hna thawh mek, Solar Water Pumping Scheme chu a hmunah a enfiah. April 2018-a thawh ṭan, ni zung chakna hmanga Chakhei khua châwmtu tur tui lakna siamna atan hian cheng nuai 272 ruahman a ni. Speaker hi MADC executive member K Hrahmo, MDC Tiahlei Syuhlyu leh PHE SDO L Zatluanga ten an ṭawiawm.

Training khâr
Mizoram Information Service (MIS) leh Mizoram Finance & Accounts Service (MFAS) foundation course training chu zawh a ni a, nimin khan ATI conference hall-ah a khârna hun buatsaih niin, IPR director David L Thangliana'n a hmanpui. Training hi June 2018 tìr lamah ṭan a ni.

Thisen pe
Champhai Bethel Venga Chhura Hmun Welfare chuan nimin khan Champhai District Hospital-ah thisen unit 10 an pe a, a petute mipa paruk leh hmeichhia pali an ni.

Bird Spot hawng
Tachhip Branch YMA leh ASEP-te bultuma buatsaih savate tuallêna hmun tura buatsaih Birds Spot chu nimin khan Tachhip Lalmual hlui hmunah bialtu MLA KS Thanga'n a hawng. KS Thanga chuan, Mizoram tan leilung pian ken, siam chawp ni lo, boruak thianghlim, ramsa leh nungcha tinrengte tuallênna mawi takte thlir kual theiha a awm chu khualzinte hîpna tur a nih thu a sawi.