PMMVY scheme kalpui dan tur sawiho

Nu nau paite leh nau pawmte tana hamṭhatna pekna scheme, Pradhan Mantri Matru Vandana Yojana (PMMVY) kalpui danah ṭha zawka an thawhho dan tur ngaihtuahin nimin khan Health Services directorate confgerence hall-ah Health department hotute leh Social Welfare department hotute an ṭhukhawm.

Meeting hi joint director (Planning) Dr C Zir­­liana'n kaihruaiin, SWD joint director Van­lal­pianpuii'n inlawmna thu a sawi a; SWD deputy director (ICDS) Zoramthangi Chhangte leh PMMVY state programme coordinator Brenda Lalrindiki ten PMMVY chungchang an sawifiah.

Department pahnih hotute hian PMMVY hnuaia hmalakna vil zui chungchanga thawhhona ṭha an neih theih dan tur te, review meeting neih hun tur leh sorkar laipuiin target a siamte khûm ngei theihna tura thawhho dan turte an sawiho a ni.

PMMVY hi hun hmasa lamah IGMSY tia hriat a ni a, Mizoramah chuan Lawngtlai district-ah kalpui a ni tawh ṭhin. January 1, 2017 aṭamgin PMMVY tia thlakin, kalphung thar changtlung zawk nen kalpui a ni.

PMMVY hnuaiah hian nu, nau pai lai leh hnute pe laite'n an fa tìrah hamṭhatna Rs. 5,000 an dawng thei dawn a, he ṭanpuina sum hi vawi khatah dawng nghal loin, ṭum thumah dawng kim tura tih a ni a; a dilna form chu anganwadi centre-ah a thlawna lak theih a ni.

Hamṭhatna dawng tur hian nuin nau a pai aṭanga ni 150 chhungin aganwadi centre-ah a inziak lut ang a, a diltu leh a pasalin Aadhaar card emaw, voter ID emaw an nei tur a nih bakah, nu-in bank account, Aadhaar nena thlun zawm a nei tur a ni. Mother & Child Protection Card neih ngei a ngai bawk.

PMMVY hnuaia hamṭhatna hian sorkar hnathawk leh nau neih senso bill theihna hmuna thawkte a huam lo a, fa tîr pai lai tan chauh dil theih a ni.