Mizoram mamawh kalphung thar siam turin kan inbuatsaih - ZPM Ṭhalai

Zoram Peoples Movement (ZPM) Ṭhalai chuan thuchhuah siamin, Mizoramin kalphung thar a mamawh tak zet thu leh Pathian duh dana rorelna dik leh hmasawnna tluantling a awm theihna atan ZPM chu kalphung thar hmanga ram siam tumin an inbuatsaih thu an tarlang.

ZPM Ṭhalai chuan, ZPM chu movement a nih angin, party mala sorkar siam tum ang an ni lo tih sawiin, "Party danga lo awm tawh, beidawngte tan hmun him a nih rualin, eng party mah ni lo, politics ngaihtuah vak ngai lo tan hmun remchang a ni," an ti a; ZPM-a tel turin inthlahrunna tur a awm lo a, sorkar hnathawk, kohhran hrang hranga chanvo/nihna nei leh tlawmngai pawl hrang hranga ram vei mi leh zirlaite tan telna chi a nih thu an sawi.

ZPM-in unit nei ve lo mah se, Local Steering Committee-te chu unit tlukpui an nih thu sawiin, "Party unit hian mipui a huapzo lo ṭhin a, Steering Committee chuan chutiang chu a ti ve dawn lo. Unit tih leh eirûk tih hi a inzawm tlat tawh avangin a aiah huapzo zawk Committee-in kan thlak mai a ni," an ti.

Congress leh MNF party kaihhruai sorkarah Chief Minister-in department mawm apiang an chang ṭhin tih sawiin ZPM Ṭhalai chuan, "ZPM-ah chuan CM-in department enkawl bik a nei dawn lo a, cabinet minister-te hnathawh a vilpui dwn a ni," an ti a; minister leh MLA-te'n sorkar motor pakhat bak an kawl dawn loh thu an sawi.

ZPM Ṭhalai chuan, Mizorama sorkarna chelh tawhte'n sorkar hmasa hmalakna an chhunzawm duh lo ṭhin chu Mizoram ṭhanmawhbáwk pakhat a nih thu an sawi a, "Hetiang hian bànsanin, ZPM sorkarah chuan sorkar hmasa hmalak tawh sa, chhunzawm tlak apiang chhunzawm a ni ang," an ti.

Village council-te her rem a, tichak turin thuneihna sang zawk pek an nih tur thu sawiin ZPM Ṭhalai chuan, "Khua leh block tinah huapzo committee din a ni ang a, sorkara hmasawnna leh a kaihhnawihah thuneihna sang tak an nei ang," an ti a; district headquarters bakah, khaw lian dang­ahte mamawh mil tâwk zelin municipality leh board din an tum thu leh, thlai thar leina tur sum budget-ah dah a nih tur thu an sawi bawk.