YMA bawlhhlawh bawm sem

Serchhip District Sanitation Task Force chuan nimin khan Serchhip khawpuia YMA branch 21-te hnenah community dustbin (bawlhhlawh báwm) 83 an sem.

Bawlhlawh báwm semna inkhawm hi DC conference hall-a buatsaih a ni a; district bawrhsap DC Sangchhin Chinzah chuan, Serchhip chu nikumah Mizoram khawpui fai inelnaah parukna a nih phak chauh thu sawiin, "Kuminah Mizoram khawpui inelna a awm leh ngei turah ngai ila, pakhatna lak ngei kan tum ang. Amaherawhchu, lawmman lak tum vanga fai ngawt loin, faina hi kan nunphunga bet tlat zawk turin kan bei dawn a ni," a ti.

Serchhip District Sanitation Task Force hian Mizoram Sanitation Task Force aṭanga component hrang hrang aṭanga an sum hmuhte leh Serchhipa department hrang hrangte thawhkhawm Rs. 2,00,000 vel hmangin July thla chhunga hmalak tur ruahmanna an siam a; chu'ng zinga pakhat chu nimina bawlh­hlawh báwm 83 sem hi a ni.