Internet service ṭhat dan tur sawiho

Lunglei District Level Telecom Committee chu nimin khan an chairman Dr Ankita Chakravarty, district bawrhsap hoin a pisaah an ṭhukhawm a, Lunglei district-a mobile network leh internet service ṭha zawk a awm theih dan tur an sawiho.

Dr Ankita Chakravarty chuan, khawvel changkang zelah inbiakpawhna ṭha a pawimawh thu sawiin, "Kan district mipuite'n mobile network leh internet chak zawk an neih theihna turin sorkarin theihtawpin hma a la a ni," a ti a; service provider-te chu hmalakpuiah a sâwm.

Lunglei DC chuan, an district khawthlang lam, a bikin Tlabung leh Bunghmun area-ahte inbiakpawhna a ṭha tâwk lo ṭhin chu pawi a tih thu a sawi a; service provider-te chu an district chhunga khua an tuam zat leh khaw tam zawk tuam tura hmalak zel an tum dan ziaka theh­lut turin a hrilh.

Service provider-te chuan an hmalakna tlangpui leh harsatna hrang hrang an tawhte an sawi. BSNL chuan Power & Electricity department optical fibre hmangin tun July thla aṭangin Lung­lei district-ah broadband leh mobile internet chak zawk pe chhuak turin ruahmanna an siam mek tih an sawi a ni.