Mizorama lêt Bru chhungkaw tinte Ṭanpuina Rs. 6,70,000 pek tum a ni

Union Home minister Rajnath Singh hoa Mizoram leh Tripura chief minister-te leh Mizoram Bru Displaced People Forum (MBDPF) president-te'n Tripura relief camp-a awm mek Mizoram Bru-te Mizorama lak lêtna tura July 2, 2018-a New Delhi-a Draft Agreement an siamah, Mizorama kîr Bru-te chu ṭanpuina leh chhawmdawlna tam zawk pek remtih a ni. Chhungkaw pakhat tana suma ṭanpuina pek tura ruahman zawng zawng hi Rs. 6,70,000 a tling.

Draft Agreement ang chuan, Tripura relief camp-a awm Bru, Mizorama lêt tur chhungkaw tin hnenah Rs. 4,00,000 leh cash assistance kum hnih chhung thla tin Rs. 5,000 (kum hnih chhungin Rs. 1,20,000) pek an ni dawn a; in sakna tur (house building assistance) Rs. 1,50,000 ṭheuh leh kum hnih chhung a thlawnin ration pek an nih dawn bakah, Tripura aṭanga Mizorama an letna senso (transportation) chu Mizoram sorkarin a tumsak dawn a ni.

Agreement-ah hian sum lama ṭanpuina bakah, anmahni dahna khua ṭheuhah kum thum chhung anmahni veng turin special police officer pali ṭheuh dah te, Mizoram mi dangte ang bawkin an lo tur ram pek te, NLUP ṭanpuina pek te, anmahni dah khawmna khaw hrang hranga Eklavya Tribal Residential School hawnsak te, in sakna tur ram ft. 40-a sei, ft. 30-a zau pek te, permanent residential certificate leh tribal certificate pek te, Special Development Project siamsak te, bank account hawnsak te, Aadhaar leh ration card siamsakte a tel.

Mizoram mi, Mizorama lâk lêt theih tur enfiah tawh chhung­kaw 5,407-a mi 32,876-te bakah, Mizorama lâk kîr tur an la awm leh awm loh enfiah nawn leh tur a ni a; Tripura Bru camp paruka awmte'n inthlannaa vote an thlak theihna turin August 31, 2018 ral hmaa Electoral Roll ennawnte an tel bawk.

Agreement chu ṭha taka hlen chhuah a ni em tih Monitoring Committee-in an en zui dawn. Monitoring Committee-ah hian chairman chu Ministry of Home Affairs-a Special Secre­tary (Internal Security) a ni a; member-te chu MHA Joint Secretary (NE), Mizoram sorkara Home Secretary, Tripura sorkara Home Secretary, MBDPF aiawh mi pahnih, Mizoram Bru aiawh leh civil society aiawhte an ni.

Inremna thuthlung an ziah tak angin, Bru-te chu September 30, 2018 ral hmain Mizoramah lâk lêt vek tur a ni a, tuna an awmna camp parukte chu October 2018 chawlkar hmasa berah khâr vek tawh tura tih a ni.
Tarlan tawh angin, Draft Agreement-ah hian MHA aiawhin special secretary (Internal Security) Rina Mitra, Mizoram sorkar aiawhin Home secretary Lalnunmawia Chuaungo, Tripura sorkar aiawhin chief secretary Sanjeev Ranjan leh MBDPF aiawhin president A Sawibunga ten hming an ziak a ni.

Kum hmasa lama Mizorama Bru hruai kîrte hnena cash assistance pek tura ruahman chu Rs. 80,000 a ni a, chu chu Bru pawlte'n tlem tiin, Rs. 1,50,000 pe turin an phut tawh ṭhin. Tuna Draft Agreement-a sum pek tur zat belhkhawm Rs. 6,70,000 hi Bru pawlte'n cash assistance atana an lo phût tawh zat Rs. 1,50,000 aiin a tam zawk hle a ni.

Hetih lai hian, MBDPF president A Sawibunga chuan zawhna chhangin, Mizoram Bru-te Mizorama an kîr huna Mizorama an awmna tur hmun ruahman tawh, Mamit district-ah khaw 48, Kolasib district-a khaw 10 leh Lunglei district-ah khaw palite chu inremna thuthlungah sawi tel a ni lo niin a sawi a; an awmna tur chungchang chu Mizoram sorkar nen a ṭul dan azirin sawiho zui ni se a duh thu a sawi bawk.

Draft Agreement tlangpui
• Chhungkaw tin hnenah Rs. 4,00,000 pek tur.
• Cash assistance kum hnih chhung thla tin Rs. 5,000 (kum hnih chhungin Rs. 1,20,000) pek.
• In sakna tur (house building assistance) Rs. 1,50,000 ṭheuh pek.
• Kum hnih chhung a thlawnin ration pek.
• Tripura aṭanga Mizorama an lêtna senso (transportation) Mizoram sorkarin a tum ang.
• Bru-te dahna khuaah kum thum chhung anmahni vengtu tur special police officer pali ṭheuh dah.
• Mizoram mi dangte ang bawkin an lo tur ram pek.
• In an sakna tur ram ft. 40-a sei, ft. 30-a zau pek.
• NLUP ṭanpuina pek.
• An awmna khuaah Eklavya Tribal Residential School hawn.
• Permanent residential certificate leh tribal certificate pek.
• Special Development Project siamsak.
• Bank account hawnsak.
• Aadhaar card leh ration card siamsak.
• Mizorama lâk lêt tura enfiah tawh chhungkaw 5,407-a mi 32,876-te bakah, mi dangte enfiah nawn.
• Camp paruka awmte'n inthlannaa vote an thlak theih nan August 31, 2018 ral hmaa Electoral Roll ennawn.