Kohhran inpumkhatna seminar

Mizoram Synod chuan nimin khan Aizawla hmun pathumah 'Kohhran in­pumkhatna chungchang seminar' an buatsaih a; Aizawl district-a kohhran hruaitu ṭhahnem tak an tel.

Synod Inkhawmpui chuan Mizorama koh­hran hrang hrangte inpumkhatna tura hmalak a rel a, chumi bawhzui chuan Synod Exe­cutive Committee (SEC) chuan hmalak zui dan tur a duang a; SEC leh Synod Officers Meeting rua­­hmannain seminar hi buatsaih a ni a, Rev. Dr H Van­­lalauva thuziah zirho a ni.

Nimina 'Kohhran in­pum­khatna chungchang seminar' hi a thawh khatna a ni a, Aizawl district chhunga Presbyterian kohhrante tan buatsaih a ni. A thawh khatnaah hian Aizawl district chu zone pathumah ṭhen niin, Mission Veng Kohhran Hall, Zarkawt Kohhran Hall leh Bawngkawn Koh­­hran Hall-ahten seminar neih a ni a; Synod puipate'n an kaihhruai bakah, se­minar paper an chhiar chhuak a, sawiho nghal a ni.

Seminar-ah hian Aizawl district-a pastor, minister leh pro.pastor-te bakah, kohhran aiawh mi pahnih ṭheuh tel tura sawm an ni a; Zone-I Mission Veng Kohhran Hall-ah mi 223, Zone-II Zarkawt Kohhran Hall-ah mi 194 leh Zone-III Bawngkawn Kohhran Hall-ah mi 222 an tel a ni.