Dinhmun ṭhaa sikul dah loh MNF-in pawi an ti
Mizo National Front (MNF) party office bearer-te chu July 5, Ningani khan an pisa, Mizo Hnam Run-ah an ṭhukhawm a; resolution pass in, MNF sorkarin higher secondary school pakua, lumpsum grant-in-aid dinhmuna a dah, kum 9 a ral hnu pawha Congress sorkarin dinhmun sang zawka a dah thei lo chu pawi an tih thu an tarlang.
MNF OB resolution chuan, lumpsum grant-in-aid HSS pakuate'n adhoc grant-in-aid dinhmuna dah an phût vanga chawlhkar hnih chhung sikul an khâr ta chu pawi an tih thu tarlangin, "Lumpsum grant-in-aid school-te bakah, adhoc aided school eng emaw zatte hi sorkarin dinhmun sang zawkah dah rawh se," a ti.
MNF OB resolution dangte
1. HSS leh college-a admission harsa em em mai hi a pawi tak zet a. Admission harsa lutuk vanga nu leh pa leh zirlaite'n harsatna lian tak an tâwk ta mek zel hi MNF chuan a sutkian dan zawng vat turin sorkar a phût a ni.
2. CSS Hindi zirtirtu mi 1,305, Congress sorkarin duh taka an lak ngei hrawkhrui zai chahsaka bàn an ni leh ta si kha a pawi tak zet a. CSS Hindi teacher-te thawh theih hun a tawpin MNF sorkar hun lai chuan sorkara an luh dan ngaihtuah ṭhin a ni a, Congress sorkara bàn an nih tâkah hian hun ka lzel turah Hindi teacher lak danah harsatna a thlen thei a, a pawi tak zet a ni.
3. SSA hnuaia zirtirtuten MNF sorkar hun laiin hlawh mumal takin thla tin an la ṭhin a, Congress sorkarah thla li te, thla ngate hlawh an la thei lo reng mai hi a pawi tak zet. Hetiang thil thleng ṭhin hian Congress sorkarin zirna a ngaihthahzia a tilang chiang hle.
4. Post graduate zirlai 1,000 chuangin post graduate scholarship tun thlenga an la thei lo hi a pawi hle a, rang taka scholarship pe turin sorkar kan phût.
5. MNF sorkar lai khan zirna kawnga hmasawn nan Mizoram Education Act pass a ni a, he Act hnuaia rules ṭha tak takte Congress sorkarin a hmang ṭangkai duh tlat lo hi zirna ngaihthahna dik tak a ni.
6. MNF chuan Pathian leh mipui zara sorkarna a siam veleh New Education Policy duan sa a kalpui dawn a, heng harsatna hrang hrang Congress sorkarin a ngaihna a hriat lohte hi MNF chuan a sukiang dawn. Education Policy thar hmangin zirna kawnga hmasawnna nasa tak thlen turin ruahmanna duan fel a ni tawh.
7. Mizoram hmun hrang hranga sawhthing chíngtute'n hralhna hre loa an dah ṭawih mek hi a pawi tak zet. MNF-in sorkarna a siam hunah chuan Socio Economic Development Project (SEDP) hmangin sawhthing chíngtute tan awmze nei takin hmalak a ni dawn. Ram chhung mai ni loin, ram páwn thlengin a hralhna tur rate ṭha tak ngaihtuah a ni ang a, sawhthing chíngtute'n an thlai chìnah chhiatna/vanduaina an tawh palhin crop insurance ṭha tak tihsak an ni dawn. Rate ṭha taka sawhthing chingtute'n an hralh theih nan sorkarin price support a pe dawn bawk.