MHIP Day vawi 44-na lawm a ni

Nimin kha Mizo Hmeichhe Insuihkhawm Pawl (MHIP) Day vawi 44-na a ni a, Mizoram hmun hrang hrangah kawng hrang hranga lawm a ni.

MHIP Day lawmna hi MHIP general headquarters hruaitute'n hmun hrang hranga an hmanpui a, president Saipuii chuan Vairengte leh Bilkhawthlir block-te a hman­pui. Ram hruaitu ṭhenkhat pawhin MHIP Day hi an hmanpui bawk.

MHIP Day-ah hian branch tam tak chuan intihhlimna hun an hmang a, branch ṭhenkhatin intihsiakna an buatsaih bakah, inkhawma thupui zirhoa hun hmangte leh mi dang ṭanpuina atana hmangte pawh an awm a ni.

MHIP Gen.Hqrs. president Saipuii chuan MHIP Day pualin thuchah a tichhuak a, "Mizo hmei­chhiate tana ni pawimawh tak a ni a, Mizoram sorkarin chawlh atana min puansak avangin sorkar chungah lawmthu kan sawi a ni," a ti.

Saipuii chuan, MHIP chu a din tirh aṭanga tun thlengin hruaitu fel tak takte kaihhruaina zarah ṭhangduang taka a awm thu sawiin, "MHIP nih hi a nuam a, kohhran leh pawl hrang hrangte zalen tak a kan awm khawm theihna pawlah Pathian beho theia kan awmte hi a va nuam em," a ti a; hun lo kal zel turah pawh MHIP hmingchhiat phal lo a, Pathian dah lal ber zel turin MHIP member-te a sáwm.

MHIP President chuan, MHIP kumpuan chu 'Hmeichhiate leh naupangte hmasawnna leh himna atan nasa taka ṭan lak’ tih a nih thu sawiin, "Hei hi nasa takin General Headquarters chuan hma kan la a, sub-headquarters leh block conference-ah leh min sawmtu branch-te hnenah kan sawi nasa hle a ni. Branch ṭhenkhat, hma la rih lem lote pawh kan la awm mai thei a, a pawimawhzia leh hmeichhia leh naupangte kan him tawh lohzia hriain ṭan i la sauh sauh ang u," a ti.