KHAWTHLIR

Project sawiho
JICA Technical Cooperation Project (TCP) hnuaia Joint Coordination Committee (JCC) chu July 5, Ningani khan CS conference hall-ah Finance secretary Lalnunmawia Chuaungo hoin an ṭhu a; Mizorama Technical Cooperation Project (TCP) kalpui dan an sawiho bakah, project thil tum leh hmalakna hrang hrangte an thlirho.

Hostel hawng
T Romana College-in Republic Venga Women's Hostel an sak thar chu July 5, Ningani khan bialtu MLA R Vanlalvena'n a hawng a, college principal Dr Lalrintluanga'n Pathian hnenah a hlan. Hostel hi a bul ṭannaah zirlai 24 tàn seat siam a ni a, tihlen zel tum a ni.

Thing phun
NEDP hnuaia Lengpui Airport leh a chhehvel chei mawina tur 'Beautification of Lengpui Airport-Aizawl' project hnuaiah Tourism department leh NSS Cell, Mizoram ṭangkawp chuan nimin khan Sihhmui leh Lengpui Airport inkar kawngpui sirah saron (bougaivillea) kûng 300 an phun.

Thisen pe
ṬKP, Thingfal Pastor Bial-te chuan nimin khan blood donation camp an buatsaih a, Lawngtlai District Hospital blood bank tan thisen unit 45 an pe a, a petute mipa 38 leh hmeichhia pasarih an ni.

Lungphùm phúm
Kolasib bialtu MLA PC Zoram Sangliana chuan nimin khan Zoram Driver's Union (ZDU), Kolasib sub-headquarters office sak tur lungphùm a phúm. PC Zoram Sangliana hian office sakna atan a MLA fund aṭangin Rs. 5,00,000 a pe a ni.

Gutkha hâl ral
Aizawla Electric Veng Branch MHIP-in Mizoram sorkar phal loh Gutkha product chi hrang hrang, January 1 aṭanga May 19, 2018 chhunga an mante chu nimin khan bialtu MLA minister Lal Thanzara nupui Zohmingthangi'n a hâl ral. An thil hâl ralte chu Shikhar báwm 7, SS I báwm 8, S 10 packet 187, Rajnigandha packet 52 leh Raja tobacco 14 a ni.