Ram hruaitute'n MHIP Day an hmanpui

Nimin MHIP Day vawi 44-na chu ram hruaitu eng emaw zatin an bial chhungah an hmanpui a, minister John Rotluangliana chuan Lengpui Model Branch MHIP-te a hmanpui.

Lengpui Model Branch-in Lengpui P/S-III-a MHIP Day an hmannaah John Rotluangliana chuan, "Mizo hmeichhiate hi an chhuanawmin kawng tinrengah Mizo mipate aiin hma an sawn tawh zawk a, thil lawmawm tak a ni. Amaherawhchu, ram leh khawtlang hmasawnna tinreng inṭanna hmun chhungkuate kan han bihchiang a, chhungkuaa dinhmun pawimawh tak luahtu chhungkaw nu berte'n ṭan an lak thar leh a ngai niin a lang," a ti.

Minister Lal Thanzara chuan a bial chhunga Electric Veng Branch--in Electric Veng YMA Hall-a MHIP Day an hmannaah thu sawiin, "Mizo hmeichhiate'n nasa takin hma an sawn a, zirna lamah leh eizawnna kawngah an ṭhang nasa hle. Mizoram sorkar pawhin Mizo hmeichhe dinhmun siam ṭha turin dan pawimawh tak 'The Mizo Marriage, Divorce and Inheritance Act' a siam a ni," a ti a; Mizo hmeichhiate chu chhungkua leh khawtlanga an pawimawhzia hria a, nu ṭha, mo ṭha, fanu ṭha nih tum turin a fuih.

Minister Vanlalawmpuii Chawngthu chuan Sailulak MHIP-te a hmanpui a; Mizoramah hmeichhiate dinhmun a ṭhat tawh thu sawiin, "Sorkar hmalaknain hmeichhiate dinhmun nasa taka chawikan niin, sorkar chuan hmeichhiate leh naupangte chhawmdawlna tur Women & Child Development lam buaipuitu tur pawh din tum a ni. Chawimawi leh chawisan tlak ni tura nun hmang thiam thei tura awm erawh a pawimawh," a ti.

Assembly deputy speaker R lalrinawma pawhin Sihphir MHIP-te a hmanpui a; MHIP member-te'n mahni hamṭhatna tur ringawt ni lo a, mipui vantlang mamawh hrang hrang atan hma an la chu fakawm a tih thu leh, MHIP member-te'n naupang zirtirnaah mawhphurna lian tak an neih thu a sawi.

Mission Veng Branch MHIP-te'n Synod Conference Centre-a MHIP an lawmna hmanpuitu, bialtu MLA Lt.Col. ZS Zuala chuan, Mizo hmeichhiate hmasawnna leh finna leh thiamnaa an chhuanawm tawhzia a sawi a, "Ram hmasawnna tura thawh kawngah pawh ngaihtuahna fîm tak nen ke pên zel ang che u. Mizo hmeichhiate hi sorkar hian thlahthlam loin chanvo a pe ṭha em em a ni," a ti.

MLA PC Zoram Sangliana chuan Kolasib Vengthar MHIP-te a hmanpui a, "Mizoramah a bikin, Kolasib district hi HIV/AIDS hluarna a ni a, hemi kawngah hian MHIP-te'n tih tur tam tak an nei. Mahni in chhung bakah khawtlangah mahni nun ṭheuh uluk taka vawn a pawimawhna tlangaupui fo a ngai a ni," a ti a; MHIP member-te chu an hmeichhiatpuite bakah, mi dang ṭanpui ngaite tan pên chhuak fo turin a chah.

MLA Lalrinawma pawhin a bial chhunga Tlungvel Branch-te a hmanpui a; nu ber a hlim loh chuan chhungkua a hlim theih loh thu sawiin, "Nute hian fate enkawl kawngah an mawhphurhna a san avangin kan fate hi eng angin nge kan enkawla kan ngaihven tih ngaihtuah let ṭhin a ṭha hle a ni," a ti a; hmeichhiate an changkan loh chuan ram an changkang thei loh thu a sawi.