Rannung seh natna vangin mi 41 thi tawh

Kum 2012 aṭanga kum­in July thla thlengin Mizoramah rannung seh natna (scrub typhus) vei mi 1,710 hmuh chhuah an ni tawh a, he natna vang hian mi 41 an thi tawh. Ketiang natna vei hi kum 2018 chhung bikah mi 721 hmuh chhuah an ni tawh bawk.

Thenzawl damdawi-in, Community Health Centre (CHC) huam chhungah rannung seh natna a lên mek avangin Health department chuan nimin khan thuchhuah a siam a; Thenzawl CHC huam chhungah kumin 2018 chhungin rannung seh natna vei mi 64 hmuh chhuah an nih tawh thu leh, June thla leh July thla bikah mi 54 hmuh chhuah an nih thu an tarlang.

Health department tarlan danin, kum 2012 aṭanga nimin July 6, 2018 thleng khan Mizoramah scrub typhus vei mi 1,710 hmuh chhuah tawh a ni a, kum ruk chhung hian scrub typhus vangin mi 41 an thi tawh. Kumin bikah, January 1 aṭanga July 6 thlengin Mizoram pumah rannung seh natna vei mi 721 hmuh tawh an ni a, chu'ng zinga mi panga chuan an thih phah tawh a ni.

Health department chuan, tun hnaiah Thenzawl CHC huam chhung­ah scrub typhus-in hluar lam a pan zel nia a lan avangin he natna chung­changah hian thuchhuah an siam tih an tarlang a; hrileng hi Integrated Disease Surveillance Programme (IDSP) team chuan a hmunah enfiah tawhin, an report pawh Central IDSP-ah an theh­lut tawh tih an sawi.

Health department tarlan danin, kumin January 1 aṭanga nimin July 6 thleng khan Thenzawl CHC huam chhungah rannung seh natna vei mi 64 hmuh chhuah tawh niin, chu'ng zinga mi 54 chu June thla leh July thla chhunga hmuh chhuah an ni. Hei vang hian May 23-24 khan IDSP team chuan nodal officer Dr Pachuau Lalmalsawma hoin a hmunah an enfiah a, awareness campaign an nei nghal bawk.

Health department chuan, scrub typhus hrik­te'n sazu-ah bu an khuar ṭhin tih sawiin, "Scrub typhus hrik pai sazute aṭangin tuhrikin la chhawng ve lehin, mihringin an lo kai ta ṭhin a. India ramah fûrah inṭanin, favâng leh thla­sikahte a hluar zual a, India hmarchhakah a tam zual bik bawk," an ti.

Scrub typhus natna vanga harsatna sukiang turin ruahmanna mumal tak siam a nih thu sawiin Health department chuan, "NEDP aṭangin sum tam tham tak hman theih turin remtih a ni tawh. Sumte hi scrub typhus chungchang mipuite hrilhhriat nan te, a test-na hmanraw ṭha zawk leh changtlung zawk Weil Felix Test leina tur leh chiang leh zuala natna awmzia zirchianna (research) atante hman a ni ang," an ti a; scrub typhus endikna hmanruate chu sorkar damdawi-in zawng zawngah dah tum a nih thu an tarlang.

Health department chuan, scrub typhus chu Mizorama natna hluar tak pakhat a nih tâk avangin mipuite chu mahni in leh a velte fai taka vawng tur te, sazu leh tuhrikte tana chêttlatna remchang siam lo tur te, a hluarna hmun­ah chuan ramkalnaah thawmhnaw phui ṭha inbel tur te, rannung duh loh odomos ointment inchulh a ṭangkai thu te, scrub typhus kai nia inringhlelte chu damdawi-in pan thuai turtein an chah.