Kolasib-ah Cancer Conclave buatsaih

July 5, Ningani khan Kolasib-a Parish Hall-ah cancer chungchang zirhona, 'Initiative of National Cancer Grid -North East Alliance against Cancer Conclave : Mizoram Chapter' buatsaih a ni a, Health minister Lal Thanzara'n a hmanpui.

Health Minister chuan, zir chianna aṭanga a lan danin, India ramah kum tin cancer vei mi nuai 15 vel hmuh chhuah ṭhin a nih thu sawiin, "Chu'ng zinga 45,000 vel chu hmarchhak bialah hmuh a ni. Heng zawng zawng aṭanga 60% chu nunphung hrisel vawn loh vang a ni a, chu'ngte chu - vaihlo zûk leh hmuam bakah, ei leh in uluk loh vangte a ni. Nunphung hrisel zawk kan zawh a hun tak zet," a ti.

Lal Thanzara chuan, Mizoram chu cancer hluarna state a nih angin sorkar pawhin theihtawp a chhuah mek zel tih sawiin, "Mizoram State Cancer Institute chu Tertiary Care Cancer Centre-ah hlankai a ni a, hemi atan hian chegn vbc. 44.27 sen tur niin, peih thuai tura hna thawh mek a ni," a ti a; Centre-ah chuan khum 100 a awm dawn a, hmanrua leh khawl ṭha ber bera thuam a nih dawn thu a sawi.

Lal Thanzara chuan, cancer natna do mai bakah, a tuar mekte ṭanpui leh chhawmdawl (palliative care) turin Mizo mipuite thawhho a ṭul thu sawiin, "Sorkar leh medical doctor-te bakah, khawtlang, kohhran leh media-te tih tak zeta mahni zâwnah ṭheuh hma kan lak a hun. A zau thei ang bera inhrilhhriatna kalpui a ngai a ni," a ti.

Conclave-ah hian cancer chungchanga Mizoram dinhmunte Dr Eric Zomawia'n a sawifiah a; Dr Ravi Kannan-a'n North East Alliance Against Cancer leh a thil tum chungchangah sawi thung. Phai lama cancer enkawlna damdawi-in ṭhenkhata mithiamte'n thu an sawi bawk.