Tipper neitu leh khalhtute'n DTO hmu

Mizoram Tipper Owners' and Drivers' Association (MTODA)-te chuan July 5, Ningani khan Aizawl DTO (District Transport Officer) Sanghnuna Pachuau chu a pisaah hmuin, hnam dang lirthei, Mizoram sorkara dan kalha register awmte titawp tura an ngenna bawhzui a nih dan an zawtfiah. DTO hian MTODA-te zawhna chhan theih loh a nei nual nia thu dawn a ni.

An inkawmnaah hian Aizawl DTO chuan, hnam dang tipper, Aizawl DTO-a registration tih chung­changah MTODA ukil kal­tlanga hriattirna a dawn angin, hnam dang lirthei, dan kalha Mizorama degister nia sawite chu an chhui chian mek thu leh, ni 60 chhunga chhanna pe tura tih a nih angin, an hriat duh zawng zawng chu ziaka a chhannaah telh a nih tur thu a sawi.

MTODA president C Lalzarmawia chuan, Transport department-in dan a siamah, sorkara lirthei register tur reng reng a dahna tur garage mumal tak an neih a ngaih thu te, sumdawnna lirthei phei chu an register-na tur hmuna chêng nghet an nih a ngaih thu te, Mizorama chêng nghet zingah pawh an awmna district ni loa lirthei ziah luh tur chu affidavit hmanga lehkha pawimawh tihfel a ngaih thute a sawi a ni.

C Lalzarmawia chuan, dan a awm reng laia dan loa Mizoram pawn lam mi, Mizorama cheng nghet ni lote'n lirthei an register thei chu an hrethiam lo hle tih Aizawl DTO Sanghnuna Pachuau a hrilh a; Aizawl DTO chuan bawhzui a nih tur thu a lo hrilh ve bawk.

MTODA hruaitute'n hnam dangin motor an register dawnah garage certificate an nei lo chunga Aizawl DTO-ah registration an tih theih dan leh, Mizoram chhunga cheng nghet ni lote'n affidavit awm si loa an motor-te an register theih chhan a zawhnate chu Aizawl DTO-in a chhang thei lo niin an sawi.