Ni 147 hnua Covid-19 vei hmuh chhuah tlem ber ní

November 28, Pathianni khan Mizoramah Covid-19 vei mi 94 hmuh chhuah a ni a, ni 147 hnua hripui vei hmuh chhuah tlèm ber ní a ni. Nimin khan tlai dar 5 thlengin hripui vei dam tawh mi 438 chhuahtir an ni a, Covid-19 vangin mi pakhat a thi.

Covid-19 vei hmuh thar mi 94-te chu mipa 48 leh hmeichhia 46 an ni a, Rapid Antigen Test hmanga hmuh vek an ni. ZMC laboratory, TrueNAT leh Fluorescent Immunoassay hmangin swab sample endik a ni lo.

Thu dawn danin, Covid-19 positive Novem-ber 28-a mi 94 hmuh chhuah hi July 4, 2021 hnua hmuh chhuah tlem ber ní a ni a, July 4, Pathianni khan sample 789 endik aṭangin hripui vei mi 88 hmuh chhuah a ni.

IDSP record angin, Mizoramah Covid-19 vei 1,34,373 hmuh chhuah a ni tawh a, mipa 64,942 leh hmeichhia 69,431 an ni a, mipa aiin hmeichhia 4,489-in an tam zawk. Nimin tlai dar 5 thleng khan mi 1,30,419 (97.07%) chhuahtir an ni tawh a, mi 493 (0.37%) thi tawhin, enkawl mek mi 3,461 (2.57%) an awm.

November 28, Pathiannia Covid-19 vei hmuh thar mi 94 zingah symptom nei mi 78 an awm a, mi 16 erawh chuan symptom an nei lo. Pathianni khan Mizorama district 11 zinga district pariatah swab sample endik a awm a, Siaha, Serchhip leh Hnahthial district-ah erawh sample endik a ni lo. Sample endikna district zingah Saitual district-ah positivity rate 64% a ni a, Lawngtlaiah 62.50%, Mamitah 25% leh Champhaiah 19.15% a ni bawk.

Tun November thla chhungin Mizoramah Covid-19 vei mi 12,849 hmuh chhuah a ni tawh a, chawhrualin ni tin mi 458.89 hmuh chhuah an awm ang a ni a, a tlahniam hret hret zel. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 28, 2021 thlenga swab sample endik tawh 14,23,763 aṭanga RT-PCR hmanga endik zat percentage chu 22.72 a ni a, RAT hmanga endik zat chu 71.37% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,34,373 chu mi 1,000 zelah hripui vei mi 122 an awm ang a ni a; mi 1,00,000 zela Covid-19 vangin mi 45 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 438 chhuahtir an ni a; Aizawl district-ah mi 260, Serchhip district-ah 66, Lunglei district-ah 46, Kolasib district-ah 24, Champhai district-ah 19, Lawngtlai district-ah 17 leh Hnahthial district-ah mi paruk an chhuak a ni.