CBI-ah thubuai tum hnih kan thlen tawh, State sorkarin phalna a pe lo a nih hmel - Lokayukta Chairman

30th November, 2021

Mizoram Lokayukta chairman C Lalsawta, IAS (Rtd.) chuan, Lokayukta-in complaint an dawn zinga pahnih chu Central Bureau of Investigation (CBI) hnenah chhui tura an thawn tawh thu a sawi a, "Mahse, state sorkarin phalna a pe lo a nih hmel," a ti.

Vanglaini palai zawhna chhangin C Lalsawta chuan, thubuai an dawnte CBI chhuitir duh nei mah se, anmahni thuin an chhuitir ngawt theih loh thu a sawi a, "CBI hian inkaihhruaina an nei a, an duh duhin state chhunga thubuaite an chhui ngawt thei lo. An danah state sorkarin phalna a pek a ngai," a ti a, state sorkarin phalna a pek chuan state chhunga thubuaite an chhui theih thu a sawi.

Lokayukta Chairman chuan, thubuai an dawn zinga pahnih chu an zir chian hnuah CBI hnenah chhui turin an thawn tawh thu a sawi a, "Kan zir chian hnuah ACB tana harsa deuh tura kan ngaihte kan thawn a, CBI lam pawh kan tih tur àwm tak a ni, an ti. Mahse, state sorkar lamin phalna an pe lo a nih hmel. Keini chuan chhuitir duh mah ila, state sorkarin phalna an pek loh chuan kan chhuitir ngawt thei lo," a ti.

Lokayukta Chairman sawi danin, thubuai pahnih chhui tura CBI hnena an ngente chu sorkara tlatlum deuh leh milian deuhte an ni a; CBI pawhin Mizoram sorkarah chhui phalna an dil ve ve a ni.

Hetih lai hian, Swadesh Darshan Scheme-II hnuaia Sakawrhmuituai tlanga skywalk leh Durtlang-Chaltlang inkara ropeway siamna tur sum chhui tura MNF Vigilance department leh MNF Legal Board-te'n November 22, 2021-a ngenna an thehluh chungchangah Lokayukta chuan thutlukna a la siam lo.

Zawhna chhangin Lalsawta chuan, MNF ngenna hi uluk taka an zir chian tur thu sawiin, "Uluk taka zir chian a nih hnuah kalpui zel a nih dan turah thutlukna siam a ni ang," a ti.

Lokayukta Chairman chuan, skywalk leh ropeway thubuai chu a len tham thu sawiin, "Contractor-te pawh state dang mi an ni. CBI chhuitir dawn ila, state sorkarin an phal si loh chuan awmzia a awm dawn lo," a ti a, thubuai kalpui dan tur chu uluk taka ngaihtuah a ṭul thu a sawi.