IPR-in Padma Shri lawmpuina an hlân

Information and Public Relations depart-ment chuan nimin khan an directorate audi-torium-ah India rama civil mite chawimawina sang Padma Shri dawngtu Lalbiakthanga Pachuau lawmpuina hun an hmang.

Lawmpuina inkhawm hi IPR joint director C Lalnunkima'n a kaihruai a; thu sawitu IPR director Lallianpuii chuan, journalist-te leh IPR department chu chhungkua ang maia inkungkaihna nghet nei, thawkho leh inmamawh tawn an nih thu sawiin, "Kan chhungkaw zinga miin chawimawina sang Padma Shri hial a dawng hi kan chhuangin kan lawmpui tak meuh a ni," a ti.

Lallianpuii chuan, mihring dam chhung tawitêah tenau pawh ni se chawimawina dawn a har tih sawiin, "Ram pum huap chawimawina sang Pu Lalbiakthanga’n a dawng thei hi a lawmawm dan a thûkin a sang em em a, he chawimawina sang dawn hi a phú em em a, a nunah entawn leh zir tur tam tak a awm a ni," a ti a; Lalbiakthanga Pachuau chu India rama working journalist upa ber, kum 94 a tlin tawh pawha chàwl loa thawk a nih thu a sawi.

Mizoram Journalists’ Association (MJA) president Zonunsanga Khiangte pawhin thu sawiin, MJA member-in Padma Shri a dawng chu an chhuang tak zet tih a sawi a, "Mi entawntlak, hun vawng dik, mi taima leh teirei peih, journalism bakah khawtlang rawngbawlnaah leh kohhran rawngbawlna thlenga sûlhnu nei ṭha a ni," a ti.

Lalbiakthanga Pachuau hnenah hian IPR Director-in lawmpuina thu chei leh shawl a hlàn a ni.