Lal Thanhawla a chawl tawh dawn ; MPCC president thar tur Lalsawta

Mizoram Pradesh Congress Committee (MPCC) elected office bearer-te nimina an president Lal Thanhawla ina ṭhukhawm chuan MPCC president thar atan vice president ni lai Lalsawta, Mission Vengthlang an ruat a; 1973-a MPCC president ni tawh Lal Thanhawla hi president aṭangin a chawl tawh dawn a ni.

Ṭhutkhawmah hian MPCC president Lal Thanhawla duh dan angin Congress party hruaitu thar ruat a ni a; president-ah vice president ni lai Lalsawta leh vice president-ah general secretary ni lai Lal Thanzara, Zarkawt ruat an ni. Treasurer ni lai Zodintluanga Ralte, Leitan chu a nihna ngai chelh zui tura tih a ni.

Congress party hruaitu tharte hi MPCC president Lal Thanhawla'n kumin atana Congress Bhavan khàrna inkhawm, December 17, 2021-a neihah a puang ang.

MPCC president atana ruat Lalsawta chuan Vanglaini palai zawhna chhángin, hruaitu thar turte chu Lal Thanhawla remruatna veka tih a nih thu a sawi a, "Lungrual takin hruaitu thar tur hi kan inruat a ni," a ti.

Lalsawta chuan, nimina thu-tlukna an siam hma hian October 10, 2021 khan ruahmanna an lo siam tawh thu sawiin, "Tuirial by-election inthlan a hnaih tawh avangin kan puang chhuak ta lo a ni," a ti a; niminah a ngai angin hruaitu thar tur an inruat leh tâk thu a sawi.

Kum 2023-a Assembly inthlan-puiah Congress party-in sorkarna siam ngei an tum thu sawiin Lalsawta chuan, "Sorkarna siam ngawt ni loin, sorkar ṭha tak siam kan tum. Chutiang tur chuan kan bei dawn a ni," a ti.

Tarlan tawh angin MPCC president Lal Thanhawla chuan MLA inthlan a chuh tawh dawn loh thu a lo sawi tawh ṭhin a ni.