KHAWTHLIR

Thisen pe
Helen Lowry Higher Secondary School NSS volunteer-te chuan nimin khan an sikul hall-ah thisen pek an huaihawt a, Civil Hospital, Aizawl tan thisen unit 77 an pe a, petute mipa 56 leh hmeichhia 21 an ni.

Kawng khâr dawn
PWD chuan December 4, 2021 thleng Bawngkawn South - Ramhlun Vengthar (Sihpui Road) inkar kawngpui an siam dawn a, kawng siam chhungin kawngpui khar a nih dawn thu Aizawl Traffic SP Rodingliana Chawngthu chuan a tarlang.

VDP golden jubilee
Electric Veng Village Defence Party (VDP) chuan November 27, 2021 khan Electric Veng YMA Hall-ah an kum 50 tlinna, golden jubilee an lawm a, Aizawl mayor Lalrinenga Sailo, VDP president hlui ni bawkin a hmanpui. He hunah hian kum 50 chhunga hruaitu lo ni tawhte hnenah chawimawina thuchei an hlan a ni. Electric Veng VDP hi October 25, 1971 khan din a ni a, ruihhlo leh sual do kawnga sorkar thâ tichakin hma an la ṭhin a, kum 2004 khan Best Community Award an dawng a ni.

MLA-in sawipui
Aizawl North-II bialtu MLA Dr Vanlalthlana chuan November 18, 2021 aṭanga kar hmasa tàwp thleng khan a bial chhunga veng tinah Local Development Committee (LDC) hotute ṭhutkhawmpuiin, bial chhung hmasawnna tur thilte a sawipui. Dr Vanlalthlana hian a biala veng tinah LDC a din a, LDC-ah chuan local council member zawng zawng bakah, tlawmngai pawl aiawh pahnih ṭheuh, political party aiawh pakhat ṭheuh leh veng chhunga paràwn pahnih ṭheuh an tel a, veng chhung tana hmasawnna turte an ngaihtuah ṭhin a ni.

Raltlan 1 luh belh
Nimin khan Hnahthial district-ah Myanmar aṭangin ráltlân mi pakhat a luh belh. Hnahthial DC office chhinchhiah danin, Hnahthial district-ah hian Myanmar ráltlân mi 2,129 an awm mek a, an zingah chhungkaw 410 an tel. Ráltlân hi Thingsaiah 661, Cherhlunah 204, Bualpui H-ah 164, Ngharchhipah 170, New Ngharchhipah 462, Tarpho-ah 70, South Chawngtuiah 25, Khawhri-ah 63, Tuipui D-ah 35, Aithur ah 14, Leite-ah 11, Muallianpuiah 11, South Vanlaiphaiah pariat leh Hnahthialah 239 an awm mek a ni.