Bamboo Processing Factory hawn a ni

Commerce & Industries minister Dr R Lalthangliana chuan, nimin khan Sairangah agarbati kuang (stick) siamna tur Bamboo Processing Factory a hawng. Factory hi Bamboo Development Agency (BDA)-in National Bamboo Mission (NBM) hnuaiah cheng nuai 125 sênga a din a ni.

Dr R Lalthangliana chuan, Mizoramin economy chawi kâng tura a mamawh ber pakhat chu mau a nia sawiin, "Raw material kan neih ṭhat ber pawh mau a ni a, sorkarin a ngai pawimawh hle a, Covid-19 léng avangin duh angin hma kan la chak thei lo," a ti a; theihtawp chhuaha ṭan an lakna azara a hlawhtlinna an hmu ta chu lawmawm a tih thu a sawi.

Mauin eizawnna ṭhahnem tak a siam theih thu sawiin R Lalthangliana chuan, "Ram páwn aṭangin mau chi ṭha kan lâk luh rualin, kan mau neih sate chhawr ṭangkaina tur kan han nei thei bawk hi a lawmawm. Mau hi a ṭhang chak a, a puitling hma bawk a, kan ram leilung leh sik leh sa mil a nih avangin kan chin uar hi a ṭul hle. Eizawnna ṭhahnem tak siam chhuak thei a nih avangin tam tham tak kan thar theih nan ṭan kan lak a ṭul," a ti.

Bamboo Development Board vice chairman Dr K Pachhunga, MLA chuan, hripui léng vanga inkharkhip leh harsatna hrang hrang avangin duh angin khawl an chah zung zung theih loh thu a sawi a, "Mau ṭha chi Latiflorus lak luha tissue culture tih tum a ni a, hemi atan hian Taiwan lam mithiamte kan be tawh," a ti a; mau hmanga sumdawnna chu hlawhtlinpui ngei an tum thu a sawi.

NBM mission director Dr Elizabeth Saipari, Horticulture director ni bawk tarlan danin, mau hman ṭangkai dan zir chiang turin India rama state hrang hrang leh India ram páwn thlengin an kal tawh. Kum 2019 aṭangin Horticulture department chuan Environment, Forests & Climate Change department aṭangin bamboo plantation an la chhâwng a; tunah hian ram hectare 700 chuanga zauah mau chi hnih - Brandisii leh Rawmi chìn mek a ni a, Mizorama mau awm sate hman ṭangkai dan tur an zir zel bawk.

Bamboo Processing Factory-ah hian round agarbatti stick unit panga, bamboo charcoal & vinegar kiln leh bamboo seasoning chamber-te dah a ni. Unit-te hian thla khatah stick ton 25 an siam thei a, India rama agarbatti siam chhuaktu company lian ber N Ranga Rao & Son-in an lei vek dawn a ni.