MGNREGS hnuaia hnathawh endik

Lunglei DC Kulothungan A chuan nimin khan Lunglei RD Block chhunga Pukpui, Serkawn, Venglai leh Luangmuala ni 100 inhlawhna, MGNREGA hnuaia hnathawh kal mekte a enfiah a; VC-te chu an hnathawh tur uluk leh awmze nei taka ruahman ṭhin tur leh mipui hmakhua ngaia ṭhahnemngai taka kalpui turin a chah.

Bawrhsap hi DRDA project director K Lalrohlua, BDO David Lalrinawma, IPRO C Lalremruati leh sorkar hotute'n an ṭawiawm a; khawtlang hruaitute nen hmalak dan tlangpui leh hmachhawpte an sawiho a ni.

Lunglei DRDA hnuaia Lunglei, Lungsen leh Bunghmun RD Block-ah kum 2020-21 chhungin MGNREGA hnuaiah ni 100 inhlawhna buatsaih a ni a; kum 2021-22 chhungin September 2021 thlengin Lunglei RD Block-ah ni 65, Lungsen Block-ah ni 64 leh Bunghmun Block-ah ni 66 inhlawhna siam a ni tawh bawk.