Minister-in dragon fruit hmun a tlawh

Agriculture minister C Lalrinsanga chuan nimin khan Thenzawla Dragon Fruit Growers & Marketing Society member chhungkaw 59 leh mimal pathumte dragon fruit hmun a tlawh. Society hruaitute nen an inkâwm a, an mamawh hrang hrang an lo thlen.

C Lalrinsanga chuan, "In mamawhte hi theihtawpin kan ngaihtuah sak dawn che u a, hei leh chen hi rim takin in lo thawk tawh a, sorkar chuan a ûm zuisak ngei ngei dawn che u a ni," a ti.

Huan thlai enkawl dante tunlai zawk leh mumal zawka kalpui zel a ṭul thu sawiin Minister chuan, "Kan sum lak luhte aṭanga kan thlaite enkawl lêt lehna lam kan uar deuh deuh a ṭul. Kan mamawh em em leiṭha siamna din tum mek a ni a, bio pesticides siamna tur bio-control laboratory te, thlai thar sawngbawlna lam leh marketing mumal zawkte neih tumin hmalak mek a ni," a ti bawk.

Thenzawl Dragon Fruits Growers & Marketing Society secretary Lalruatsanga Pautu tarlan danin, an member chhungkaw 59 leh mimal pathumte'n dragon fruit ban 200 ṭheuh, a vaiin unit 62-ah dragon fruit ban 12,000 a awm a, kung 36,000 an phun. Ban 400 tal neih vek theih beiseiin sorkarah dilna an thlen mek a, ban 400 chin chu chhungkaw châwmna leh eizawn nana tlinga ngaih a ni.

Society-te hian Minister hnenah hian a panna kawng chungchang te, tui, kawlphetha, beneficiary tihbelh, a sawngbawlna leh an mamawh dangte an lo thlen a ni.