Lirthei chuan man an zawm ṭha

State Transport Authority (STA)-in Mizorama sumdawnna lirthei chuan man (fare) a bithliah, September 1, 2021-a hman ṭan chuan zawm a hlawh thawkhat a, chuan man dik lo lak vanga lungawi lohna STA-a thlen a la awm lo.

STA hotute hnen aṭanga Vanglaini thu dawn danin, September 23, 2020-a STA ṭhukhawm chuan mihring phur lirthei - city bus, town bus, line bus, bazar bus, MST bus, maxicab, taxi, two wheeler taxi leh auto-rickshaw chuan mante chu bithliah thar tura hmalak a rawt a ni.

STA thutlukna bawh-zuiin district hrang hrang bawrhsapte chu an huam chhunga mihring phur lirthei kaihhnawih pawl te, consumer union-te leh tlawmngai pawlte nen inràwn khâwmna buatsaih a, an rawtnate STA-a thehlut tura tih an ni. March 23, 2021 khan STA-in rawtna a dawnte aṭangin lirthei chuan man thar a tichhuak a ni.

Vanglaini palai zawhna chhángin STA hotute chuan, lirthei chuan man chu an duh dan anga an bithliah loh thu an sawi a, "Rawtna lo lutte leh driver hlawh, oil, petrol leh diesel man, mechanic rawihna leh lirthei chhiah pun dante ngun taka kan ngaihtuah bakah, pawl leh official ràwn tur ṭul nia hriatte kan rawn hnuah rate thar hi kan bithliah ṭhin," an ti.

STA hotute chuan tun dinhmunah sorkarin chuan man a bithliah ang ni loa rate siam an awm loa an hriat thu Vanglaini an hrilh a, "Rate dik loa la an awm palha complaint-na tur kan siam a, district tina DTO leh Transport Director hnenah ziaka complaint thehluh theih a nih bakah, DTO tina officer-in-charge kan ruatte hnenah phone hmanga thlen theih a ni," an ti a, dan zâwm lote thuneitute hnena thlen vat ṭhin turin mipui an ngen nghal.

Mihring phur sumdawnna lirtheiah fare meter vuah vek tura hma an lak thu te, taxi leh two wheeler taxi-a hman tur bik ICT department nen software an duan mek thu an sawi bawk.