Lungleiah Road Safety Week

Zoram Drivers Union (ZDU) Sub-Headquarters, Lunglei chuan nimin zing khan Lunglei Venglai Traffic Point-ah nimin aṭanga December thla chhung zawng awh tur Road Safety Week an hmang ṭan a, Lunglei SP Rex Zarzoliana Vanchhawngin a hawng. Week thupui chu 'Fimkhur la, nun chhanhim rawh' tih a ni.

Road Safety Week vawi 40-na hawnna inkhawmah hian SP Rex Zarzoliana Vanchhawng chuan, "Kan himna a pawimawh a, chumi atan chuan tu nge mawhphur tih kan ngaihtuah chian a ngai. Tun ang hun hi a tlangpuiin lirthei chêtsual tam hun a ni fo. Hetiang huna Road Safety Week hman a ni hi a lawmawm hle a ni," a ti a; himna atan police bakah mi tinin mawhphurhna an neih thu a sawi.

Lunglei district transport officer David Lalrinawma pawhin thu sawiin, kum tin lirthei khalh thar an awm avangin dan leh hrai inhrilh thar zel a ṭul thu a sawi a, "Road Safety Week a hlawhtlin theih nan Transport department, Police leh mipui thawhhona ṭha a pawimawh," a ti.

Lunglei ZDU president Zairemthanga chuan, Road Safety Week chuan rah ṭha a chhuah ngei a beisei thu leh fimkhurna rilru put reng a pawimawh thu a sawi a; lirthei khalhtute chu fimkhurna vawng reng turin a chah a ni.