TJ Lalnuntluanga'n a zin report a pe

Minister of state TJ Lalnuntluanga chuan nimin khan Hnam Runah tunhnaia Delhi a zin ṭum a, central sorkara mi pawimawh hrang hrang a dawr chanchin a sawi.

New Delhi-a a chàm chhunga a tihte sawiin Minister chuan, minister of state for EFCC Ashwini Kumar Choubey a hmuh thu a sawi a, "Forest department mamawh hrang hrang ka thlen. Dampa Tiger Reserve hnuaia thawkte'n sum an hmuh ṭhat loh vanga hlawh lama an harsatnate sawipuiin theihtawp a chhuah tur thu min hrilh a ni," tiin a sawi.

Transport minister TJ Lalnuntluanga chuan, Shipping minister Sarbananda Sonowal hmuin, Mizorama luite lawng kal thei tura siam chungchang a sawipui tih sawiin, "Khawthlangtuipui-Tuichawng lui siamna tur DPR cheng vbc. 22.93 chu Central-in a pawm tawh thu min hrilh a, tender chhuah a nih veleh sum sanction a nih tur thu leh release a nih tur thu min hrilh," a ti.

Tlawng lui chu national waterway (NW-102) a nih anga hma laksak vat tura a ngen thu sawiin Minister chuan, "Proposal siam turin min ti a, bawhzui nghal a nih tur thu min hrilh bawk," a ti a; Chhimtuipui lui Darzokai aṭanga Lomasu thleng techno feasibility study tura tender buaipui mek a nih thu ka hrilh a, hemi atan hian sum mamawh min sanction turin ka ngen bawk," a ti a, tender tihfel a nih veleh sanction an pek tur thua a lo chhàn thu a sawi.

Champhaia auditorium sakna tur sum DoNER Secretary a sawipui thu te, Law & Justice minister Kiren Rijiju chu district court sak ṭhat chungchang a sawipui thu te, DoNER leh Culture minister G Kishan Reddy hnenah Champhai Tagore Cultural Complex sakna atan DPR an thehluh tawh thute a sawipui tih a sawi bawk.