CM-in Prime Minister hnenah Mizoram mamawhte a thlen

Sorkar laipui hotute dàwra New Delhi-a chám mek chief minister Zoramthanga chuan nimin khan Parliament building-ah prime minister Narendra Modi a kâwm a, Mizoram mamawh leh hmasawnna tur hrang hrang a thlen.

Mizoram sorkar thuchhuah tarlan danin, CM Zoramthanga hian a hnena Union Home Minister leh minister dangte'n an lo tiam tawh angin Mizoramin all India service cadre hran a neih theihna tura chak taka hmalakpui turin Prime Minister a ngen a; Mizoram separate cadre a neih theihna tura a khawihtu ber Union Secretary hnenah lehkha ziak a, tihhlawhtlin thuai a nih theih nan file pawh chak taka kaltir tura hriattir turin PM a ngen a ni.

Chief Minister hian Mizoram sorkarin Mizo ṭawng thiam ngei chief secretary a neih theihna tura ngenna sorkar laipuia a thlen tawh chungchang pawh a sawi chhuak a, Prime Minister hian a lo bawhzui tur thu a sawi.

CM Zoramthanga chuan mau chungchanga Mizoram sorkar hmalakna PM Narendra Modi a hrilh a, mau chìnna hmun leh a sawngbawlna hmunte thlalak nen entirin, bamboo link road sial a ṭulzia a thlen.

Bamboo link road chungchangah hian PM Modi chuan, a hlawhtlin ngei theihna atana Finance Minister hnenah sum leh pai sanction-na turin head of account siam tura a hriattir tur thu Zoramthanga a hrilh a ni.

Myanmar ram buai avanga Mizorama tlânchhia ráltlânte ṭanpui turin Chief Minister chuan Prime Minister a ngen a, MNF returnee-te tan housing assistance a dilpui bawk. Prime Minister chuan a ṭul anga a lo en zui tur thuin a chháng.

CM Zoramthanga leh PM Narendra Modi hian hmarchhak state bakah, Bangladesh leh Myanmar-a politics boruak pawh an sawi dun a ni.

Chief Minister chuan, Prime Minister nen ṭha taka an inkâwm thei chu lawmawm a tih thu a sawi a; an inhmuh tawh zinga a hlawhtling ber pawl nia a hriat thu a sawi tih sorkar thuchhuah chuan a tarlang.