Florist Fair vawi 42-na buatsaih a ni

Mizoram Florists Association chuan nimin khan Aijal Club Park-ah Florist Fair vawi 42-na an buatsaih a, chief secretary Dr Renu Sharma-i'n a hawng. Fair-ah hian dawr 101 hawn a ni a, December 3, 2021 thleng a awh ang.

Dr Renu Sharma chuan, Florists Asso-ciation-in sorkar ṭanpuina tel loa pangpar pho chhuahna changtlung tak an buatsaih chu chhuanawm a tih thu sawiin, "Lengpui Airport leh Aizawl khawpui hmun lailia Mahatma Gandhi lim dahna hmunah pangpar huan mawi tak in enkawlte hi a lawmawm tak zet a, Mizoram hmél timawitu in ni," a ti a; an hmalak zelna turah duhsakna a hlân.

Mizoram Florists Association hi November 11, 1997-a din a ni a; pangpar chíngtute'n eizawnna leh sum hnâr rintlak atana pangpar leh a kaihhnawihte an hman theih nan kawng hrang hrangin hma an la ṭhin a, pangpar chìn, enkawl leh khawi dan chungchang lehkhabu panga an tichhuak tawh. Kum 1999 aṭangin Flower Show/Florist Fair an buatsaih ṭan a, kum khatah vawi khat aia tamte buatsaih ṭhin a ni.