World AIDS Day pualin hun hmang

Alliance India chuan nimin khan Hotel Floria, Aizawlah vawiin, December 1 - World AIDS Day pualin HIV/AIDS donaa sûlsutu leh hma hruaitute tawnhriat, hmalak dan leh hnathawh dan sawihona an buatsaih a, Health & Family Welfare minister Dr R Lalthangliana'n a hmanpui.

Dr R Lalthangliana chuan, HIV veite zir chianna HIV Estimation 2019-in India ram chu HIV/AIDS tlem tawhna ram (low prevalance country) tia a chhinchhiah tawh thu leh state tam zawkah HIV positive an tlakhniam mek thute a tarlang tih a sawi a, "Chutih laiin, state ṭhenkhatah ram puma HIV/AIDS punna rate aia pung sangte a awm a, chung zingah chuan Mizoram pawh kan tel. Hei hi thil ngaihtuahawm tak a ni," a ti a; HIV/AIDS donaa pawl hrang hrangte inkarah thawhhona chak zawk a awm a ṭul thu a sawi.

Mizoramin kawng tam takah ṭhatna a neih rualin, HIV/AIDS dinhmuna a sanna te, cancer vei tam dan leh zûk leh hmuam a hluarnate chu a chhuanawm lo tih sawiin R Lalthangliana chuan, "Mihring dam hun chhung rei lo têah kan mihringpuite leh ṭanpui ngaite ṭanpui leh an tana luan chhuah leh rawngbawlsak hi kan dam chhan pawimawh tak ni se ka duh," a ti.

He hunah hian Alliance India chuan Mizorama HIV/AIDS donaa thawk mek pawl hrang hrangte chu chak zawka hma lak dan tur an sawipui a; Health Minister hian Alliance India buatsaih ‘Scripting Change Alliance India’s COVID Response’ tih lehkhabu a tlangzarh a ni.