KHAWTHLIR

Krismas pual thisen pek hun
Association for Voluntary Blood Donation (AVBD), MSACS leh blood bank hrang hrangte chuan vawiin December 1 aṭang hian December thla chhung zawng blood bank hrang hrangah Krismas pual thisen pek rûnpui an huaihawt dawn a, Civil Hospital, Aizawl medical superintendent Dr Lalhmuchhuaka'n a hawng ang. Mizoram ṭhalaite chu an remchanna hmunah Isua Krista piang lawm nan thisen pe ṭheuh turin an sáwm a, thisen pete chu ei leh in tuihnai zawk an hlui dawn a ni.

Helipad tur enfiah
Assembly deputy speaker Lalrinawma chuan nimin khan a bial chhunga Ngentiang khuaah helicopter ṭumhmun tur a enfiah a, GAD Civil Aviation deputy controller Lalsangpuia'n a ṭawiawm. Helipad siamna tur hi a bul ṭan nan MLA fund aṭanga thawh tur a ni.

Thisen pe
JL Higher Secondary School NSS chuan nimin khan Civil Hospital, Aizawl tan thisen unit 46 an pe a, petute mipa 39 leh hmeichhia pasarih an ni a; Ramthar North Branch YMA pawhin an YMA Hall-ah Aizawl Civil Hospital tan thisen unit 36 an pe a, petute mipa 27 leh hmeichhia pakua an ni. KṬP, Bawngkawn Bethel Bial chuan nimin khan Synod Hospital tan thisen unit 27 an pe a, petute mipa 24 leh hmeichhia pathum an ni. Region HSS NSS, Lawngtlai pawhin an sikulah Lawngtlai District Hospital tan thisen unit 39 an pe a, petute mipa 33 leh hmeichhia paruk an ni.

Minister-in hmanpui
Mizo Students' Union (MSU) chuan Pangbalkawn leh Meidumah November 29, Thawhṭanni khan zirlai ti ṭhate lawmpuina hun an buatsaih a, minister of state K Lalrinliana'n a hmanpui. Pangbalkawna HSLC zo thar pariat, HSSLC zo thar pahnih leh Meiduma MA leh BA zir zo mi pahnih ve ve hnenah lawmpuina hlan a ni.