Lungleia RT-PCR bun tur sawiho Lab. bun ṭan hun tur a la hriat loh

Nimin khan Health department hotu te, Lunglei Sub-Hqrs. YMA hruaitute leh Lunglei MHIP hruaitute'n YMA Sub-Hqrs conference hall-ah Lungleia RT-PCR khawl bun tur chungchang an sawiho. Laboratory kháwl bun ṭan hun tur hriat theih a la ni lo tih an tarlang.

Ṭhutkhawm hi YMA Lunglei Sub-Headquarters president Lalrotluanga'n a kaihruai a; Health department aṭangin National Health Mission mission director Dr Eric Zomawia, Lunglei chief medical officer Dr LC Liana, Lunglei Civil Hospital medical superintendent Dr SR Ngurchamliana leh thawktu dangte an tel.

Dr Eric Zomawia chuan, India Covid-19 Emergency Response & Health System Preparedness Package: Phase-II (ECRP-II Package) kaltlangin Lungleia RT-PCR laboratory mamawh bungrua leh thil hrang hrang leina atan cheng nuai 30 dawn a nih thu a sawi a, "Government e-Marketplace (GeM) portal hmanga online bidding kaltlanga buaipui mek a ni a, hmanraw ṭhenkhat lo thleng tawhin, thleng kim thuai tura hmalak a ni," a ti.

Tarlan a nih danin, RT-PCR khawl enkawl turin Lunglei Civil Hospital-a thawk mek officer leh thawktu dangte chu Viral Research and Diagnostic Laboratory (VRDL), ZMC-ah training tir an ni a, mi paruk chuan training an zo tawh.

RT-PCR laboratory bun thuai turin khawl zuartu Mizoram Business Centre, Tuikual North chu biak niin, November 26, 2021 ral hmaa buntir turin hrilh an ni a; Health Minister pawhin a be tawh a ni. Mizoram Business Centre chuan manufacturer a be nghal a, lehkha a thawn bawk.

Mizoram Business Centre neitu hi NHM pisaah léngin, November 26, 2021-ah chuan an bun hman dawn loh thu te, theihtawpa service engineer-te rawn kal vat tura a nawr mek thu leh, remchang hmasa berah rawn tirh an tum thu a sawi. RT-PCR khawl bunna atan hian a ṭul chuan ZMC-a microbiologist-te pawh kal an inhuam a ni.