Kolasib district-ah Krismas/kumthar ruai ṭheh phal

Kolasib bawrhsap Dr H Lalthlangliana hoin nimin khan DC conference hall-ah December 1-31, 2021 chhunga Kolasib district-a Covid-19 dona kalpui dan tur sawiho a ni a; Krismas leh kum thar vuakvetah kohhran committee-in rem a tih chuan ruai buatsaih an phal.

Dr H Lalthlangliana chuan, Kolasib district-a Covid-19 léng dinhmunin ziaawm lam a pan zel thu sawiin, "Hmun ṭhenkhat containment zone-a puan mekah pawh hri vei zatin hniam lam a pan zel a ni," a ti a, mipui thawhhona leh thawktute inpekna fakawm a tih thu a sawi.

Ṭhutkhawmah hian Kolasib district-a Covid-19 inkaihhruaina tur an siam a, "State sorkar aṭangin inkaihhruaina (SoP) thar siam a nih pawhin thu leh awm hma chuan Kolasib district-ah hei hi hman chhunzawm zel tur a ni," an ti.

Inkaihhruaina thar turah chuan mitthi vuina, khawhar lênpuina leh lungphunnaa zai chungchangah mitthi làwina kohhran leh an awmna branch YMA-te’n ṭha an tih angin kalpui turin an rél a; Krismas leh kum thar vuakvetah kohhran committee-in rem an tih chuan ruai buatsaih an phal a ni.