DC-in kawng siamna tur rawra Hmang zui tawh lo turin a hriattir

Kolasib bawrhsap Dr H Lalthlangliana chuan nimin khan Rengtekawn leh Builum inkar kawng, PMGSY hnuaia siam mek a tlawh a; kawng siamna atana hman rawra chu hmang zui tawh lo turin a hriattir.

Rengtekawn-Builum kawng siam hna hi chak taka thawh a nih theih nan lirthei kal theih loha khàr a ni a, mahse, Kolasib DC-in a tlawh lai hian hna thawktu hmuh tur an awm mumal loh bakah, hmanraw chhêk khawl hmuh tur a tam lo. Dr H Lalthlangliana chuan, hna thawktute thil tih dan chu a hriatthiam loh thu sawiin, contractor-te a rang thei ang bera koh a tum thu a sawi.

Kolasib DC hian kawng siamnaa hman tura rawra an chhawp ṭhenkhat chu a endik a, a chhiat lutuk avangin hmang zui lo turin hna thawktu awm mekte chu a hriattir a ni.

Kolasib Bawrhsap chuan, Rengtekawn-Builum kawng chu kut hnathawktute feh kawng a nih thu sawiin, "Kawngpui ṭha kan duh vangin huana feh tur pawh feh thei loin kan dang a, hetiang leka contractor-te'n hma an la hi chu hriatthiam a har a, mipui zah lohna a ni. A ṭul anga hmalak a ni ang," a ti.

Kolasib Rengtekawn aṭanga Builum kawng PMGSY hnuaia siam mek hi km. 13.52-a thui a ni a; contractor pali - Colin Lalsangpuii (km. 0-3, estimate cheng nuai 446.36), Lalparmawia (km. 3-6, estimate cheng nuai 390.55), Sapthangliana (km. 6-9, estimate cheng nuai 354.85) leh P Lalbiaka (km. 9-13, estimate cheng nuai 690.93) a ni.

September 17, 2018 aṭangin hna thawh ṭan a ni a, kum khat chhunga thawh zawh tura tih a nih laiin, an thawh zawh theih loh avangin chhuanlam hrang hrang vangin vawi nga hun pawhsei an dil angin pawhseisaka hun pek belh an ni tawh. Tun dinhmunah hna thawh tur aṭanga 72% thawh zawh a ni tawh.

Kolasib DC hi Kolasib PWD executive engineer Vanlalmuana Fanai leh Rengtekawn VC-te'n an ṭawiawm a ni.