Covid-19 vangin mi 497 thi tawh

Nimin khan tlai dar 5 thlengin Covid-19 vangin mi pali an thi a, natna dang nei tel vek an ni. IDSP, Mizoram tarlan danin, nimin tlai dar 5 thlengin Mizoramah Covid-19 vangin mi 497 an thi tawh a, tun November thla bikah mi 65 an thi a ni.

Thawhṭanni zan zanlai pelh hnu, nimin zing dar 12:50 khan Rosiamkima (36), Kawrthah, Mamit district chu Covid-19 vangin State Referral Hospital-ah a thi a; Covid-19 vei a ni tih November 21, 2021-ah hmuh chhuah niin, SRH-ah dah luh nghal a ni tih sorkar thuchhuakin a tarlang.

Nimin zing dar 9:15 khan Al Lei Sungi (84), Tlangnuam chu hripui vangin SRH-ah a thi a, Covid-19 positive a ni tih November 16, 2021 khan hmuh chhuah niin, SRH-ah enkawl nghal a ni. Nimin chawhma dar 10:50 khan C Lianhlira (87), Hnahthial chu hripui vangin SRH-ah a thi a, Covid-19 vei a ni tih October 30, 2021 khan finfiah niin, SRH-ah dah luh nghal a ni.

Rangkhuma (94), Lungdai, Kolasib district pawh nimin chawhma dar 11:05 khan hripui vangin SRH-ah a thi a; Covid-19 positive a ni tih October 29, 2021 khan hmuh chhuah a ni a, SRH-ah dah luh nghal a nih thu sorkar thuchhuakin a tarlang.