Mizoram electoral roll aṭanga Tripura-a Bru-te paih turin ngen

Tripura-a cheng Bru, Mizoram electoral roll-a la chuangte chu paih a, Tripura electoral roll-a sawn turin ZPM Ṭhalai senior vice president Dr C Lalrammawia'n nimin khan Election Commission of India (ECI)-a Chief Election Commissioner hnenah ngenna a thlen.

ZPM Ṭhalai Sr. Vice President hian Tripura-a awm Bru, Mizorama vote la neite chu Mizoram electoral roll aṭanga paih a, an awmna Tripura electoral roll-a telh tura ngenna lehkha ECI-ah a thawn a; a lehkha chu Mizoram Chief Electoral Officer hnenah a pe a ni.

Dr C Lalrammawia chuan, "Inthlan dawn apiangin Bru vote kan induh lohsiak a, sorkarna lo siam tawh party-te zingah a taka Bru vote transfer tura hma la ngam an awm si lo a, ZPM Ṭhalai chu a takin a che chhuak ta a ni," a ti.

ZPM Ṭhalai Sr. Vice President chuan a lehkhaah, Tripura-a awm Bru zingah Mizorama lêt duhte chu an rawn haw mai thu tarlangin, "Mizorama awm duh lote Mizoram electoral roll-a an la awm reng hi ZPM Ṭhalai chuan a ngaimawh hle a ni," a ti a; Tripura-a awm Bru-te chu an awm duhna hmun Tripura-ah vote neihtir turin ECI a ngen a ni.