Zuk leh hmuam ṭhat lohzia inzirtir

Mizoram State Tobacco Control Programme leh Hospital & Medical Education-te chuan nimin khan Directorate of HME auditorium-ah HME-a thawkte tan vaihlo zûk leh hmuam ṭhat lohna leh a kaihhnawih zir chianna an buatsaih.

Inkhawm hi State Tobacco Control Programme state nodal officer Dr H Lianthangpui'n a kaihruai a; thusawitu Dr T Lalhmangaihi, HME director chuan, zûk leh hmuamin natna a thlen tih sawiin, "Min tiretheitu leh sum tihektu mai a ni. Zahawm lo taka min lantirtu a nih avangin kan sim a ṭul tak meuh. Sorkar office-a thawkte kan nih avangin kan thawhna hmunhmate pawh smoke free zone-ah kan siam a ngai a ni," a ti.

Zir chiannaah hian Aizawl East DTCC Rebecca Lalruatfeli Hnamte, psychologist leh state consultant R Lalremruata ten 'Zûk leh hmuam chungchang' leh 'Zuk leh hmuam leh sorkar hnathawkte' tih thupui an sawi.

NTCP hi India ramah kum 2007-ah kalpui ṭan niin, Mizoramah pawh kum 2009-ah kalpui ṭan a ni a, tunah hian thawktu 41 awmin, Mizoram district tinah thawktu pali zel an awm a ni.