Mizoramah Covid-19 vei mek enkawl zat a tlahniam tial tial

November 29, Thawhṭanni khan Mizoramah Covid-19 vei mi 437 hmuh chhuah a ni a, hripui vei enkawl mek mi 3,582 awmin, positive hmuh tawh aṭangin 2.62% a ni a, a tlahniam tial tial. Nimin khan hripui vei dam tawh mi 269 chhuahtir an ni a, Covid-19 vangin mi pali an thi.

Covid-19 vei Thawhṭannia hmuh thar mi 437-te chu mipa 188 leh hmeichhia 249 an ni a; ZMC laboratory-a hmuh chhuah 25, TrueNAT hmanga hmuh 53, RAT hmanga hmuh 348 leh Fluorescent Immunoassay (FIA) hmanga hmuh 11 an ni.

IDSP record angin, Mizoramah Covid-19 vei 1,34,810 hmuh chhuah a ni tawh a, mipa 65,130 leh hmeichhia 69,680 an ni a, mipa aiin hmeichhia 4,550-in an tam zawk. Nimin tlai dar 5 thleng khan mi 1,30,781 (97.01%) chhuahtir an ni tawh a, mi 497 (0.37%) thi tawhin, enkawl mek mi 3,542 (2.62%) an awm.

November 29, Thawhṭannia Covid-19 vei hmuh thar mi 437 zingah symptom nei mi 291 an awm a, mi 146 erawh chuan symptom an nei lo. Champhai district-a TrueNAT hmanga hmuh chhuah mi 18 zinga a zatve mi pakuate chu Holy Angels School hostel-a awmte an ni a, an zingah symptom nei mi paruk an awm.

Thawhṭannia swab sample endikah district pariatah positivity rate 10% chung lam a ni a, positivity rate sanna ber Saitual district-ah 25.26% a tling. Positivity rate 10% chung lam dangte chu - Mamit 21.19%, Lunglei 16%, Champhai 15.03%, Siaha 14.76%, Serchhip 13.84%, Hnahthial 13.68% leh Lawngtlai 12.03% a ni.

Tun November thla chhungin Mizoramah Covid-19 vei mi 13,286 hmuh chhuah a ni tawh a, chawhrualin ni tin mi 458.14 hmuh chhuah an awm ang a ni. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 29, 2021 thlenga swab sample endik tawh 14,28,828 aṭanga RT-PCR hmanga endik zat percentage chu 22.67 a ni a, RAT hmanga endik zat chu 71.43% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,34,810 chu mi 1,000 zelah hripui vei mi 123 an awm ang a ni a; mi 1,00,000 zela Covid-19 vangin mi 45 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 269 chhuahtir an ni a; Aizawl district-ah mi 169, Champhai district-ah 43, Lunglei district-ah 35, Mamit district-ah 14, Hnahthial district-ah panga leh Lawngtlai district-ah mi pathum an chhuak.

Nimin zinga sorkar laipuiin Covid-19 report a tihchhuaha a lan danin, Mizoramah Covid-19 vei enkawl mek mi 3,805 awmin, positive hmuh chhuah tawh aṭangin 2.82% a ni a, 96.81% chu an chhuak tawh. Mizoram dawta active case sanna ber chu Kerala niin, 0.88% an awm. Thawhṭanni kha India ramah hripui vei 6,990 hmuh belh a ni a, hun rei tak chhunga hripui vei hmuh thar tlem ber ní a ni.