Zanah curfew puan zui zel a ni dawn; Inkhawmah zai phal loh thupek a awm lo

State Disaster Management Authority (SDMA) hnuaia State Executive Committee chairman Dr Renu Sharma, chief secretary chuan nimin khan December 1 aṭanga January 15, 2022 thlenga Covid-19 inkaihhruaina a tichhuak a; district tinah zan dar 9 aṭanga a tuk zing dar 4 thleng curfew kalpui chhunzawm tura tih a nih laiin, kohhran inkhawmnaah zai phal loh tih thupek a awm lo.

Inkaihhruaina thara a lan danin, inkhawmna leh puipunna hmun dangah a hmunhma zawh tâwk zatve (50%) aia tama punkhawm a la him rih loh thu tarlan a ni a; ei leh in sem leh ruai ṭheh a la him rih loh thu leh buatsaih loh a him rih thute tarlan a ni.

Hetih lai hian, inkhawmnaah zai phal loh tih thu pek a awm lo a, mask vuah loa thusawi leh zai a him loh thu erawh tarlan a ni thung. "Ṭang taka kan ṭawng emaw kan zai hian aerosol (chilper sîn tak, boruaka chámbáng rei si) kan phuh chhuak a, aerosol kha hma zâwn ft. 4 zên zâwn thleng kan phuh chhuak thei. Ṭha taka mask kan hren chuan hma lama aerosol chhuak tur chu kamsir/biang lamah emaw lu lamahte mask chuan a lo dang per a, a léng thui lo bawk a ni," tih a ni.

Aizawl khawpui pâwn lama inkaihhruaina chu district tina district magistrate-te siam tura dah a ni a; zan lama curfew erawh chu Mizoram pumah kalpui tur a la ni thung. Krismas leh kum thar lawmna chungchangah, hunpui lawm laiin hripui a darh loh nan theihtawpa ṭan lâk a ngaih thu tarlan a ni bawk.

Sorkar thuchhuah chuan, tun hnaiah Covid variant thar Omicron a awm avangin uluk taka invên a ṭul tih a tarlang a, "Covid-19 hripui laka kan him theih nan Covid-19 laka nun dan tur ṭha taka zâwm chungin inkaihhruaina kan hman mek chu tlem tidanglamin kalpui chhunzawm ṭha a ti," a ti. Inkaihhruaina hi kalpui mek nen a inang tlangpui a ni.

Aizawla inkaihhruaina ṭhenkhat
* Pawl 10 leh 12 zirlaite School Education department thuchhuak angin sikul leh hostel hawn phal a ni.
* Training institute-ah a hmuna leng zat chanve luah khatin hawn phal a ni.
* Chhun leh zanah biak-ina leng zat chanve aia tam loin inkhawm pangngai neih phal a ni.
* Kohhran inkhawmpui chhûn lamah phal a ni.
* Inneih inkhawm leh mitthi vui inkhawmah a hmuna leng zat chanve emaw, mi 50 aia tam lo emawa tih phal a ni.
* Picnic spot hawn phal a ni.
* Bazar leh dawr chi hrang hrang hawn phal a ni a, phal hun chhung (dar zat) tarlan a ni lo.
* Lirthei intlân chhawk chhunzawm tur. Inrinni, Pathianni leh public holiday-ah lirthei zawng zawng tlan phal.
* Public transport vehicle-te leh bungraw phur lirtheite a ngai anga intlan chhawk tur.
* Mimal leh sorkar lirtheite tlân loh ni:
i) Thawhṭanniah 1 & 2-a tawp tlan phal loh.
ii) Thawhlehniah 3 & 4-a tawp tlan phal loh.
iii) Nilaini-ah 5 & 6-a tawp tlan phal loh.
iv) Ninganiah 7 & 8-a tawp tlan phal loh.
v) Zirtawpniah 9 & 1-a tawp tlan phal loh.