Thla 18 chhungin rûi chunga lirthei khalh mi 93 driving licence suspend a ni

Aizawl District Transport Office (DTO) chuan kum 2017 leh kumin June thla thlengin rûi chung lirthei khalh an mante zinga mi driving licence 93 an tihtawp lailawksak (suspend) tawh a; taxi leh two wheeler taxi pasarih chu rate dik lo lâk vangin pawisa chawitirin an hrem tawh bawk. Aizawl DTO hian kumin 2018-ah lirthei thar 7,086 an ziak lut (register) tawh a ni.

Vanglaini palai zawhna chhangin Aizawl DTO Sanghnuna Pachuau chuan, January - December, 2017 chhungin zu ruih vanga lirthei khalh traffic police-in an man mi 66 leh kumin 2018-a June thla thlenga an man 27-te chu an driving licence an suspend tawh a, an vaiin mi 93 an ni tih a sawi. Ruih vanga driving licence suspend zingah hian doctor pakhat a tel.

Hetih lai hian, Kerala state-a Urnakulam district chhung, Karupampadi Police Station aṭanga an thu dawn bawhzuiin, Aizawl DTO ṭanga driving licence nei hnam dang lirthei pakhat khalhtu licence chu suspend a ni bawk.

Aizawl DTO chuan, ruih vanga man lirthei khalhtute chu The Central Motor Vehicles Act, 1988 Section 19 leh The Central Motor Vehicles Rules, 1989 Section 21 tlawhchhana hrem an nih thu a sawi.

DTO sawi danin, Traffic police-'n zu rûi chunga lirthei khalh an mante chu Traffic OC-in an manna lehkha fel taka ziakin, Rs. 2,000 an chawitirna thil telin DTO-ah a thawn ṭhin a; DTO chuan The Central Motor Vehicles Act, 1988 hmangin an driving licence chu thla ruk chhung atan a suspend ta ṭhin a ni.

Kum 2010-a UNO Assembly-ah lirthei chetsualna thlentu tam ber chu rûi chunga khalh vang, tih a nih avangin kum 2020-ah chuan lirtheia chetsualna tihtlem dan tur an rel a; UNO thurel chu India sorkar pawhin bawhzuiin, Supreme Court kutah a dah a ni. Supreme Court chuan kum 2015 khan circular a chhuah a; state leh union territory sorkarte chu driving licence suspend chu a rei lo berah thla thum tal a ni tur a ni, tih a ni.

The Central Motor Vehicles Act, 1988 Section 66 U/S 192(A) hmangin lirthei permit pek ṭhin a ni a, permit pek dan ang ni loa lirthei hmangte chu hrem theih an ni. Hremna hmasa berah Rs. 2,000-5,000 inkar chawitir theih a ni a, a hnuah Rs. 10,000 aia tam lo thlengin chawitir theih a ni. Tuna Aizawl DTO Sanghnuna Pachuau-in kum 2016-a a hna a zawm hnuah commercial vehicle permit tihtawp a la awm lo.

Aizawl DTO chuan, Aizawla two wheeler taxi pali chu State Transport Authority (STA) rate siam aia sanga an tlân avangin hrem an nih tawh thu sawiin, "Mi pakhat hremna atan Rs. 2,000 zel chawitir ṭhin a ni," a ti a; kum 2017 leh 2018 chhungin taxi pangngai pathum hrem a ni tawh tih a sawi.

DTO pisaa thawkte chuan, two wheeler taxi-te chu hrem an nih hmain insawifiahna hun pek ṭhin an nih thu sawiin, "STA rate siam aia toa chuan man late hêkna lut chu an ngaihtuah nghal zel a ni a, hremna pek zel an ni," an ti.

Aizawl DTO (Urban)-ah hian kumin kum chanve (January-June) chhungin lirthei 7,086 ziah luh a ni tawh a, ni khatah lirthei 59.5 ziah luh thart zel ang a ni. Kumina Aizawl DTO-a lirthei ziah luh zat hi a pung delh zel a; January thlaah 1,006, February-ah 1,139, March-ah 993, April-ah 1,181, May-ah 1,434 leh June thlaah 1,333 a ni.