Task Team-te'n vawiinah ramri an zir chiang ṭan dawn

Mizoram leh Assam ramri zir chiang tura Mizoram sorkarin a din Core Committee hnuaia Task Team chuan vawiin, July 9 aṭang hian a hmun­ah kalin ramri an zir chiang dawn.

Task Team hi coordinator Lal­nunzira, Kolasib DFO hoin July 4, 2018 khan an ṭhukhawm a; Core Committee-in a hmun ngeia kala ramri zir chiang tura thutlukna a siam tawh avangin, July 9 aṭanga ramria kala Mizoram leh Assam ramri dinhmun zir chian hna ṭan turin thutlukna an siam a ni.

Task Team hian ramri hrûla khua, ramri chungchang hre chiang turte lo zawng chhuak turin Zohmun, Saipum, Vairengte, Buichang, Bairabi, Zamuang leh Kanhmuna Forest Range Officer-te an ruat.

Ramri zir chian hna hi July 9-18, 2018 chhung neih a ni dawn a, an thil hmuh chhuahte chu July, 2018 chhunga chief minister Lal Thanhawla hnenah thehlut tura tih a ni.

Mizoram leh Assam ramri zir chiang tura Mizoram sorkarin a din, Core Committee chuan Survey of India, 1933-in Assam leh Mizoram ramri a siam chu dik tawk loah an ngai a, survey neih ṭhat leh rêlin, survey nei tur hian Task Team an din a ni.

July 4, 2018-a Task Team mee­ting-ah hian Coordinator bakah, Kolasib ASO, Buhchang RO, Vairengte RO, Saipum RO leh MZP aiawhin Kolasib MZP hruaitu pahnih an tel.