Kum 2017-18 chhunga nau piang 14,946

Kum 2017-18 chhung khan Mizoramah nu nau pai sorkara inziak lut 20,041 an awm a; nau 14,946 an piang a, chu'ng zinga 131 chu thi saa piang an ni.

Health & Family Welfare department-in Reproductive & Child Health (RCH) report a tarlan danin, kum 2017-18 chhunga nau piang zawng zawng 14,946 zinga chu'ng zinga 14,815 chu dama piang an ni a, dama piang percentage chu 99.12% a tling. Dam piang 14,815 zinga 141 chu thla kim lo (kar 37 aia tlem pai)-a piang an ni thung.

Nau piang zinga 13,820 chu an pian aṭanga darkar khat chhunga nu hnute hne nghal an ni a; chutih laiin, nau piang zinga 643 chu an pian tirha kg. 2.5 tling lo an ni. Nau piang zinga 12,576 chu damdawi-in leh nau neih theihna hmun bika piang an ni a; zai chhuah 1,971 an awm a, in lama piang 1,978 an awm bawk.

Hetih lai hian, kum 2017-18 chhung khan sorkar leh sorkar agency hrang hranga nau pai inziak lut zat chu 20,041 an ni a, chu'ng zinga 14,703 (93.36%) chu nau an pai ṭan aṭanga chawlhkar 12 chhunga inziak lut an ni. Nau pai chhung zawnga ṭum li leh a aia tam inentir (check-up) 7,972 (39.77%) an awm.

Nu nau pai laia Hb 7 aia hniam 454 hmuh chhuah an ni a, thisen sang nei 333 hmuh chhuah niin, nau pai laia thisen pek 71 an awm a; nau titla 911 an awm bawk.

Family planning programme hnuaiah condom 1,40,746 sem a ni a, oral pill 78,742 sem a ni. Nau pai lo tura invenna hman-rua - intrauterine contraceptive device (IUCD) vuahsak nu 1,441, PPIUCD vuahsak nu 192, PAIUCD vuahsak nu 45 an awm a ni.