Laldenga thlànah hriatrengna pangpar dah

July 7, Inrinni kha MNF dintu leh chief minister hlui Laldenga kum 1990-a a thih champha a ni a, Aizawl Treasury Square-a a thlànah MNF party hruaitute'n amah hriatrengna pangpar an dah.

Inrinni zing kara Laldenga hriat­rengna hunah hian a nupui Lalbiak­diki, MNF president Zoramthanga leh MNF hruaitu dangte'n pangpar an dah a; Zoramthanga chuan, Lal­denga ang mi ropui Pathianin Mizote a pe chu vanneihthlak a tih thu sawiin, "Pathianin Mizote hi hnam, sakhua leh ram min pe a, hemi humhalh tlat duhna leh hma­ngaih­na thinlung Pu Laldenga'n Zofa­tea a tuh hi a ropui tak zet a ni," a ti.

MNF President chuan, Laldenga chu India ram mai ni lo, khawvela Mizo hnamte pholangtu a nih thu sawiin, "Khatih hun laia Zofate mai ni loin, ṭhangthar zelte thinlungah hnam thinlung a tuh a. Sawisela ngaihnêp tum awm ṭhin mah se, kan finna a sang zel a, Pu Denga hlutna hi kan hre chiang tulh tulh a ni," a ti a; Mizo hnam leh Mizoram a awm chhung chuan Laldenga hming a daih dawn loh thu a sawi.

Laldenga nupui Lalbiakdiki pawhin thu sawiin, "Tun thlenga ka pasalin chawimawi a la hlawh hi a fel vang ni loin, Zoram tana a hnathawhte hriatreng a nih vang a ni. A thiha Central sorkar ruahmannaa state funeral nena ropui taka vui a ni pawh kha Zoram leh hnam tana a hnathawh vete vanga chawimawina a ni a, a mimalin engmah ni lo mah se, miin a hnathawh vete pawm a, an chawimawi hi a ropui ka ti a ni," a ti.

Mi tam takin Mizo Hnam Pa tia an vuah Laldenga hi July 11, 1927-ah Lunglei Pukpuiah a piang a, kum 1944-ah British Indian Army a zawm. Kum 1959-ah Mizo National Famine Front a din a, chu pawl chu October 22, 1961-ah Mizo National Front (MNF) tia thlak a ni. Kum 1986-a India sorkar nena inremna ziah hnuah Mizoram sorkar lailawk (interim)-ah chief minister a ni a, kum 1987-a Mizoram state Assembly inthlan hmasa berah Sateek leh Aizawl North-II bialah thlan tlin niin, Mizoram state a nih hnua chief minister hmasa ber a ni.

Laldenga hi kum 1990-ah cancer a nei tih hriat a ni a, Memo­rial Sloan Kettering Cancer Centre, USA-ah thla thum chhung enkawl a nih hnuah Mizoram pana an haw kawngah, Ashford Hospital, London-ah July 7, 1990 khan a thi a ni. Laldenga ruang hian July 11, 1990 tlaiah Aizawl a thleng a, July 13, 1990-ah state funeral-a vui niin, tun thlengin Mizo zinga state funeral-a vui awm chhun a ni.