Hnam dang tipper 18 Assam-ah lêttír Lailapur-ah lirthei an dang ve nghal

Mizoram Tipper Owner's & Driver's Asso­ciation (MTODA) mem­ber-te chuan July 6, Zirtawpni zan khan Mizoram páwn lam mite'n Mizoram sorkara an register tipper 18, Mizorama lut tur chu Kolasib Tuiṭha Vengah an lo dang a, Assam lamah an lêttir. Chumi hnuah Forum for Protection of Non Mizos invuahte'n Lailapur-ah motor an dang zui ve leh nia thu dawn a ni.

Thu dawn danin, July 6 zanlai vela state páwn aṭanga hnam dang tipper rawn lutte hi Mizoram police-in zuiin an vên bakah, tipper neitute'n car-in an zui a; tipper-te hian Bagha leh Lailapur aṭangin Mizorama dah tur balu leh brick an phur a ni.

Hnam dang tipper-te chu police-in veng mah se, MTODA member, Aizawl leh Kolasib-a mite chuan Kolasib Tuiṭha Vengah an lo dang a; hun eng emaw chen an indan hnuah Assam lamah an lêttir a ni.

Mizoram Tipper Asso­ciation president C Lalzarmawia chuan, thil thleng chu Kolasib District Transport Officer-in dan bawhchhiaa hnam dang, Mizoram mi ni lote motor a register vanga thleng a nih thu a sawi a; Kolasib DTO-a hnam dang tipper register tawh zawng zawng chu 21 nia an hriat thu leh, chiang zawka hre turin RTI Act hmanga an zawh mek thu a sawi bawk.

Kolasib-a tipper association president F Lalbiakliana pawhin, hnam dang tipper dan loa Mizoram register-te thlamuang taka Mizoram rawn hruai thleng tura escort order petuin dan a bawhchhia nia an ngaih thu a sawi.

Tipper neitu pawl hruaitute chuan, hnam dang tipper 18 véng (escort) tura thu petu hriat a nih loh thu sawiin, Home Minister-in a hriatpui lo a, Kolasib DC leh Home department lam pawhin an hre lo niin an sawi.

Thil thleng avang hian Kolasib DC Dr Arun T chuan July 7, Inrinni khan a pisaah Kolasib SP, magis­trate, DTO, tipper association hruaitute leh tlawmngai pawl hruaitute a kâwm a; Bawrhsap chuan, hnam dang tipper chungchangah hian July 10-ah Vairengte SDO (Civil) pisaah Cachar DC, SP leh mi pawimawh dangte nen meeting an nei dawn tih sawiin, mee­ting-a sawi atana an ngaih pawimawhte thehlut turin tipper association-te a ngen a ni.