KHAWTHLIR
Thisen pe
Division SAY Council ruahman angin July 7, Inrinni khan Aizawl city area-a Tachhip CO Bial leh Aibawk CO Bial ten Aizawl Temple Corps Centenary Hall-ah Aizawl Civil Hospital tan thisen unit 63 an pe a, a petute mipa 60 leh hmeichhia pathum an ni. Inrinni vêk khan Dawrpui Vengthar West Branch KTP member mipa 13 leh hmeichhia pangate'n Synod Hospital tan thisen unit 18 an pe a; Champhaiah Adventist Youth Federation (AYF) member mipa 37 leh hmeichhia 13-te'n unit 50 leh, Lungleiah AYF member mipa 11 leh hmeichhia pahnihte'n unit 13 an pe bawk.
ZPM ṭhalaiin phut
Zoram Peoples' Movement (ZPM) ṭhalaite chuan thuchhuah siamin, tun hnaia Tourism minister John Rotluangliana'n sum tam taka senga sak, Serlui-B Hydel Project bula tourist lodge panna kawngah July 15, 2018 aṭangin motor kal phal a nih loh tur thu Power & Electricity SDO-in July 4, 2018-a a chhuah chu hriatthiam har an tih thu an tarlang a, Serlui-B Hydel Project panna kawnga lirthei tlan phal a ni dawn loh chhan chu sawifiah turin thuneitute an phût.
Khawl sem
CodNerc leh an thawhpui Charity Aid Foundation (CAF)-te chuan mite chhawmdawl tura an kalpui, 'Puitu Project' kaltlangin Tlabung leh a chhehvela puanṭhui zir chhuak mi 30 hnenah July 7, inrinni khan puanṭhui khawl an sem. CodNerc leh CAF hian Tlabung leh a chhehvelah 2018 kum tìr aṭangin Puitu Project an kalpui a ni.
Tui tla zawng mek
Lalrinawma (35) h/o Lalengmawii, North Khawlêk chu July 5, 2018 khan Tuivawl lui, Tuihliap/Khuailui chuahah chesualin, tuiah a tla a, nimin thleng khan a ruang hmuh a la ni lo. Lalrinawma ruang hi North Khawlek bakah an ṭhenawm khuate'n an zawng mek. N Khawlek Branch YMA president HT Lalawmpuia hnen aṭanga thu dawn danin, Lalrinawma hi a ṭhiante pahnih nen livirin a la a, livirin hun eng emaw chen a theh vir hnuah Lalrinawma chu a inham chhuak hmasa ber a, a ṭhiante chhan tumin tuiah a lut leh a, chhan hman lohin tuiin a la ta a ni. A thiante pahnih zinga pakhat zawk Ṭharopuia chu inhai chhuak thei a, an ṭhian pakhat James-a chu mau pein a kai chhuak hman.