MZP-in khawpui leh thingtlangah zirtirtu A inkhai rual theih nan hma an la dawn

MZP hruaitute chuan July 7, Inrinni khan Aizawl Press Club-ah thuthar thehdarhtute an kâwm a; Mizoram sorkar sikulah zirtirtu an inkhai rual loh thu sawiin, "Zirtirtu an inkhai rual zawk theihna atan theihtawp kan chhuah dawn," an ti.

MZP president L Ramdinliana Renthlei chuan, thingtlangah zirtirtu an indaih loh nasat thu sawiin, "Zirtirtu inkhairual lo lutuk vangin zirna-in ṭhenkhatah zirna dinhmun a chhiat phah hle. Khawpui leh thingtlang lam zirlaite'n zirna dinhmun inang tlang leh intluk tlang taka zirna ṭha an dawn kan duh," a ti a; sorkar sikula zirlaite'n zirna intluktlang an dawn theih nan zirtirtu sem rual turin sorkar an phût thu a sawi.

L Ramdinliana sawi danin, The Right of Children to Free and Compulsary Education (RTE) Act, 2009-in zirtirtu pakhatin naupang a zirtir tur zat, pupil teacher ration (PTR) a tarlan dan chuan, primary school-ah zirtirtu pakhatin naupang 30 a zirtir tur (30:1) a ni a, upper primary (middle school)-ah 35:1 a ni. RMSA framework-ah chuan secondary level-ah chuan PTR chu 30:1 a ni thung.

Mizoramah chuan PTR hi P/S-ah 18:1, M/S-ah 9:1, high school-ah 8:1 leh higher secondary school-ah 14:1 a ni.

MZP President chuan, zirtirtu tam tak an awm chunga sikul hrang hranga zirtirtu indaih lohna a nasa chu mak an tih thu sawiin, "A chhan chu, zirtirtu an tlem vang ni loin, zirtirtu awm sa rualkhai taka thingtlang leh khawpui sikulahte sem rual loh vang a ni. Zirtirtu awm sa sem rual chungchang hi Chief Minister leh School Education Minister pawh sawipui an ni tawh," a ti.

Zirtirtu sem rual chu chak zawka kalpui turin thuneitute MZP-in an ngen nawn leh tih sawiin L Ramdinliana chuan, "Zirtirtu awm sa sem rual chungchangah hian thuneitute leh sorkara thil ti thei tak takte inrawlh lo tur leh harsatna thlen lo turin kan ngen a ni," a ti a; khawpuiah zirtirtu tam tak an awm laia thingtlanga an indaih lo chu mak an tih thu a sawi.

MZP hruaitute sawi dan­in, Aizawla P/S, M/S leh H/S ṭhenkhatah chuan zirlai 55 awmnaah zirtirtu pariat awmna te, zirlai 63 awmnaah zirtirtu 10 awmna te, zirlai 43 awmnaah zirtirtu 11 awmna te, zirlai 93 awmnaah zirtirtu 12 awmna te, zirlai 35 awmnaah zirtirtu pakua awmna te, zirlai 47 awmnaah zirtirtu 10 awmnate leh zirlai 63 awmnaah zirtirtu 11 awmnate a awm.

Hetih lai hian, thingtlanga P/S 11-ah chuan zirtirtu pakhat chiah an awm a, anni hian zirlai 40 chuangte an enkawl. Thingtlanga P/S 45 chuan zirtirtu pahnih chiah an nei bawk.

Zirtirtu tura lak ni si, office-a dah ṭhahnem tak an awm thu sawiin MZP hruaitute chuan, "Heng zirtirtu tura lak office hrang hranga attach-a awmte hi an awmna tur hmunah kal turin kan ngen a ni. Zirtirtu awm sa sem rual chungchangah hian MZP chuan na takin hma a la dawn a, zirtirtu awm sa rualkhai taka thingtlang leh khawpui sikulahte sem rual a nih loh chuan a ṭul angin thingtlang lam zirlaite'n zirna ṭha an dawn ve theih nan hma kan la dawn a ni," an ti.