Ramri sipai BSF hotuin Tlabung a tlawh

Border Security Force (BSF) additional director general (Eastern Command) Nasir Kamal, IPS chuan July 6, Zirtawpni khan Tlabung a tlawh a; YMA hruaitute leh khawtlang hruaitutu dangte nen inkâwmin, Tlabung leh a chhehvela mamawh hrang hrangte an sawiho.

Tlabung Branch YMA hruaitute chuan, tun hnaia tuilianin harsatna lian tham tak a thlen thu sawiin, Khawthlangtuipui chu fûr ruahtui vang chauh ni lo, thil dang vanga chak taka lian ṭhin nia an hriat thu an hrilh a, "Bangladesh ram chhunga kawlphetha siamna tura Kaptai tuikhuah (dam) khu tui len thut ṭhin chhan niin kan hria," an ti a; hemi chungchang hi ram pahniha thuneitu sang zawkte'n an sawiho theih nana hma la turin an ngen.

YMA hruaitute chuan, kum rei vak lo kal taah India ram chhunga balu latute chu Bangladesh sipai BGB-te'n ralthuam nena an lo rîkrâp thu an sawi a; BSF-in skills development programme an kalpui mek chu tun aia lian zawka kalpui an duh dante an lo thlen bawk.

BSF ADG Nisar Kamal chuan, tuilian vanga Tlabung leh a chhehvel mipuite'n harsatna an tawh chungchang leh, Kaptai dam vangin tui a lian thut ṭhin nia sawi chungchang chu July 23-25, 2018 chhunga ram pahnih aiawha Inspector General chinte Bangladesh-a an ṭhutkhawm hunah an sawi tur thu a sawi. Tlabung YMA-te chu ziaka memorandum buatsaih tur leh, chu chu Joint Water Commission-ah a thehluhsak tur thu a hrilh a ni.