Traffic Jam Free Rally buatsaih

Transport department bultumin July 7, Inrinni khan Mizoram Enfield Rider-te'n Aizawl Traffic Jam Free Rally an nei a, Ṭhuampui aṭangin Aizawl veng hrang hrangah an tlân kual.

Rally khârna inkhawm, Transport directorate pisaa buatsaihah Aizawl Traffic Jam Free chairman Lalbiakzama, Home department additional secretary chuan, driving rules-te chu mipuiin zawm ṭha se chuan traffic jam a ziaawm tur thu sawiin, "Kawng kual laia motor dah khap a ni tih hre reng chunga dah lui an awm ṭhin. Kan kawng a zîm nen, hei hian traffic jam a tizual a, kawng kual laiah motor dah loh hram i tum ang u," a ti.

Traffic deputy SP K Laltluangliana pawhin thu sawiin, mahni motor ṭheuh ken chhuah ai chuan, public transport hman tamin traffic jam a tizia thei tih sawiin, "Tunlaiah sikul naupangte pawh motor-in kan thlah nasa a, naupang pakhat motor pakhata hruai ai chuan, veng khata awm tan motor pakhatah a huhoin hruai thei ila, traffic jam nasa lutuk a ziaawm dawn a ni. Aizawla traffic jam nasat chhan ber chu motor tam lutuk hi a ni," a ti a; kea kal tam inzirtir a pawimawh thu a sawi bawk.